بازاڕی خانووبەرە لە کوردستان بەشێوەیەکی بەرچاو ڕوو لە دابەزین دەکات

ئاڤا نیوز

بازاڕی خانووبەرە لە هەرێمی کوردستان ڕووی لە دابەزینە، خاوەنی نووسینگەیەکی خانووبەرەش لەوبارەیەوە دەڵێت 'هەر مووڵکێک 50 تا 60 وەرەقە دابەزیووە'.

وێنە گەورەکە: دوو ڕۆژە شەڕ و ئاڵۆزی لەنێوان ئێران و ئیسرائیل دروست بووە، کاریگەری و لێکەوتی ئابووریی بەسەر وڵاتانی ناوچەکە و جیهان بەدوای خۆیدا هێناوە، لەلایەک نرخی دۆلاری بەرامبەر دیناری عێراقی و تمەنی ئێرانی بەرزکردووەتەوە، لەلایەکی دیکەش نرخی زێڕ و نەوتی زیاد کردووە، هاوکات ئەم ئاڵۆزییانە کاریگەری لەسەر بازاڕی خانووبەرەی هەرێمی کوردستان دروست کردووە.

لێدوانی فەرمی: سەیوان حەمەساڵح، خاوەنی نووسینگەی فرۆشتنی خانووبەرە لە سلێمانی، بە ئاڤا میدیای ڕاگەیاند: بازاڕی خانووبەرە وەستاوە، هەندێک موڵک کە نرخیان چوار بۆ پێنج دەفتەر دۆلارە 50 تا 60 وەرەقە لە نرخیان شکاوە.

- هەر کەسێک پێشتر کڕیار بووبێت، ئێستا پەشیمانە و موڵک ناکڕێت، جگە لەوەش خاوەنی پڕۆژەکان دەچن موڵک لە خەڵک وەردەگرن و یەکەیەکی نیشتەجێبوونی پێ دەدەن، ئەگەر موڵکەکە بە 10 دەفتەر دۆلار لە کەسێک وەربگرن، ئەوا لە بازاڕدا بە نۆ دەفتەر دەیفرۆشن، بۆ ئەوەی بیکەن بە پارەی کاش.

لەلایەکی دیکەوە: هێمن سوڵتان، خاوەنی نووسینگەی خانووبەرە لە هەولێر بە ئاڤا میدیای ڕاگەیاند: مانگێکە بازاڕی خانووبەرە کزە، لەگەڵ دروستبوونی شەڕی ئێران و ئیسرائیل و نەبوونی مووچە بازاڕ زۆر خراپتر بووە، نزخی زەوی 20 تا 30 وەرەقە دابەزیووە، بۆ نمونە ئەگەر شوقەیەک نرخی چوار دەفتەر و نیو بێت، ئێستا مامەڵەکار بە چوار دەفتەریش نایەوێت.