سوودانی داوا لە ئێران دەکات عێراق لە جەنگی ئیسرائیل تێوەنەگلێنێت

ئاڤا نیوز

سوودانی داوای لە ئێران کردووە بنکە سەربازییەکان و بەرژەوەندییەکانی ئەمریکا لە خاکەکەیدا بۆردوومان نەکات و تارانیش بەڵێنی داوە گرژییەکان بۆ خاکی عێراق نەگوازێتەوە.

وێنە گەورەکە: دوو ڕۆژە گرژیی و پێکدادانی ڕاستەوخۆی سەربازی لەنێوان ئێران و ئیسرائیل بەردەوامە، عێراقیش ترسی هەیە لەوەی گرژییەکان بۆ ناوخاکی وڵاتەکەی بگوازرێنەوە ئەوەش مەترسی لەسەر ئاسایش و دۆخی ئابووری عێراق دروست دەکات.

زانیاریی تایبەت: محەممەد شیاع سوودانی، سەرۆکوەزیرانی عێراق داوای لە ئێران کردووە، بنکە سەربازییەکان و بەرژەوەندییەکانی ئەمریکا لە خاکی عێراق بۆردوومان نەکات. هاوکات فشار لە گرووپە چەکدارەکانی نزیک لە ئێران دەکات کە هیچ جوڵەیەکی سەربازی نەکەن و ئەمریکا ئیستیفزاز نەکەن.

لەلایەکی دیکەوە: بەرپرسێکی باڵای عێراق لەمبارەیەوە قسەی کردووە و دەڵێت، ئێران بەڵێنی داوە گرژییەکان بۆ خاکی عێراق نەگوازێتەوە، هەرچەندە ئێران تووڕەیە لەوەی ئیسرائیل خاکی عێراق بۆ هێرشکردنە سەر ئێران بەکاردەهێنێت.


ئەوەی پێویستە بیزانیت: دوێنێ شەو هاوپەیمانێتی چوارچێوەی هەماهەنگی کە هەموو لایەنە شیعەکانی بەشدار لە حکومەتی عێراق لەخۆدەگرێت، بەپەلە کۆبوونەتەوە.

ئەو مانایەی دەگەیێنێت: حکومەتی عێراق ترسی هەیە لە شەڕێکی گەورەی هەرێمییەوە تێوەبگلێت و خاکی وڵاتەکەی ببێتە گۆڕەپانی ڕووبەڕووبوونەوەی لایەنە ناکۆک و دژبەیەکەکان، بۆیەش لەلایەک فشار لە گرووپە چەکدارەکانی عێراق دەکات تا هیچ جوڵەیەکی سەربازی نەکەن، لەلایەکی دیکەشەوە داوا لە لایەنە ناکۆکەکان دەکات عێراق لە پریشکی ئاگری ڕووبەڕووبوونەوەکانیان بەدووربگرن.