ترەمپ: لەگەڵ پووتین هاوڕاین لەسەر کۆتایپێهێنانی جەنگی نێوان ئیسرائیل و ئێران

ئاڤا نیوز

 

سەرۆکی ئەمریکا و ڕووسیا لە پەیوەندییەکی تەلەفۆنیدا تاوتوێی ڕاگرتنی جەنگی نێوان ئێران و ئیسرائیلیان کرد. لەهەمان کاتدا  گفتوگۆیان لەبارەی گەڕێکی دیکەی دانووستانەکانی نێوان ڕووسیا و ئۆکرایناش کرد.

وێنە گەورەکە: ماوەی دوو ڕۆژە جەنگی نێوان ئێران و ئیسرائیل دەستی پێکردووە و هەموو ئاماژەکان بەرەو فراوانبوونی جەنگەکە دەڕۆن، تاران و تەلئەڤیڤ هەڕەشەی تووند لە یەکتر دەکەن و ئەمشەو بە تەقینەوەی دۆخەکە ناوزەند دەکەن، وڵاتانی ناوچەکە لە لێواری دابەشبووندان بەسەر هەردوو بەرەکەدا و مەترسی فراوانبوونی جەنگەکە و بەشداری دەوڵەتانی دیکە یەکێکە لە ئەگەرە مەترسیدارەکان.

بڵاوکراوەی فەرمی: دۆناڵد ترەمپ، سەرۆکی ئەمریکا ئەمشەو لە پلاتفۆرمی تروس سۆشیال ڕایگەیاند: بەرەبەیانی ڕۆژی شەممە ڤلادیمێر پووتین، سەرۆکی ڕووسیا پەیوەندی پێوەکردم و پیرۆزبایی ڕۆژی لە دایکبوونی لێکردم، نزیکەی کاتژمێرێک قسەمان کرد و هەردوولا هاڕابووین لەسەر کۆتایپێهێنانی جەنگی نێوان ئێران و ئیسرائیل، کاتێکی کەمیشمان بۆ جەنگی نێوان ڕووسیا و ئۆکراینا تەرخان کرد و قسەمان لەسەر کرد.

دووبارە پێوویستی کۆتایپێهێنانی جەنگی ڕووسیا و ئۆکراینام پێڕاگەیاند و سەرۆک پووتینیش ئامادەیی بۆ گەڕێکی نوێی گفتوگۆ و ئاڵوگۆڕی دیلەکان ڕاگەیاند.