دۆناڵد ترەمپ: بەزووترین کات ڕێککەوتننامەی ئاشتی لەنێوان ئێران و ئیسرائیل ڕادەگەیێنم

ئاڤا نیوز

سەرۆکی ئەمریکا ڕایدەگەیەنێت، دەبێت بەزووترین کات جەنگی نێوان ئێران و ئیسرائیل کۆتایی پێبێت و "خۆم بەو ئەرکە هەڵدەستم و ڕێککەوتننامەی ئاشتی ڕادەگەیەنم".

وێنە گەورەکە: لێکەوتەکانی هێرشی ئیسرائیل بۆ سەر ئێران و کوشتنی فەرماندە سەربازی و زانا ئەتۆمییەکان، لەبەرامبەردا وەڵام و هەڕەشەکانی ئێران، جیهان و ڕۆژهەڵاتی ناوەڕاستی خستۆتە مەترسیدارترین دۆخ و قۆناغی سیاسی و سەربازییەوە، هەردوولا بەرەو ئاراستەی جەنگی مەزن ئامادەکاری دەکەن و هەوڵی کۆکردنەوەی پشتیوانی سەربازی وڵاتانی دیکە دەدەن، بەڵام ئەمڕۆ دۆناڵد ترەمپ پێچەوانەی لێدوانەکانی پێشوو داوای کۆتاییپێهێنانی جەنگەکەی کرد.

لێدوانی فەرمی: دۆناڵد ترەمپ، سەرۆکی ئەمریکا ئەمڕۆ یەکشەممە ڕایگەیاند: دەبێت جەنگی نێوان ئێران و ئیسرائیل کۆتایی پێبێت و ڕۆژهەڵاتی ناوەڕاست بگەڕێتەوە بۆ قۆناغی پێش جەنگ و دووبارە ئەو ناوچەیە شکۆدار و مەزن بکرێتەوە. دەشڵێت، ئێستا کۆبوونەوە و پەیوەندی زۆر لە نێوان سەرۆکەکاندا ئەنجام دەدرێت بۆ کۆتایهێنان بە جەنگی نێوان هەردوو وڵات، بەڵام خۆم لە نزیکترین کاتدا کۆتایی بە جەنگەکە دەهێنم و ڕێککەوتنامەی ئاشتی ڕادەگەیێنم هەروەک چۆن کۆتاییم بە جەنگی نێوان پاکستان و هیندستان هێنا.

لەلایەکی دیکەوە: ترەمپ پەیامێکی هەڕەشە ئامێزی بۆ ئێران نارد و ڕایگەیاند: ئەمریکا باشترین و ترسناکترین چەک و پێداویستی سەربازی لەسەر ئاستی جیهان دروست دەکات و زۆرینەیان بۆ ئیسرائیل بەردەست دەبن.