سەرجەم كۆمپانیاكانی كوردستان بەدیجیتاڵی دەكرێن و ژمارەی بێهاوتایان پێ دەدرێت

ئاڤا نیوز

سەرجەم كۆمپانیا تۆماركراوەكانی هەرێمی كوردستان بەدیجیتاڵی دەكرێن، ئامانجەكە؛ پێدانی ژمارەی یەكەی بێهاوتایە بە كۆمپانیاكان.

وێنە گەورەكە: پرۆسەی دووبارە ناساندنەوەی كۆمپانیاكان لە سیستمی تۆماركردنی دامەزراوە بازرگانییەكان لە بەڕێوەبەرایەتیی كۆمپانیاكانی پارێزگاكان ئەنجام دەدرێت، مەبەست لێی بەدیجیتاڵكردنی داتا و زانیاریی كۆمپانیا تۆماركراوەكانە لە پرۆسەی پێدانی ژمارەی یەكەی بێهاوتا، بەر لە تۆماركردنیان لە سیستمی تۆماركردنی دامەزراوە بازرگانییەكان. بەجۆرێك دوای ڕێككەوتی 1-7-2025، هیچ مامەڵەیەكی كۆمپانیاكان بەبێ پرۆسەی ناساندنەوە و بەدیجیتاڵكردن، ڕایی ناكرێت.

لێدوانی فەرمی: بڵند محەممەد، بەڕێوەبەری گشتیی تۆماری كۆمپانیاكانی هەرێمی كوردستان ڕایگەیاند، بە پێى فەرمانی کارگێڕیمان ژمارە 13631 لە 4-6-2025، هیچ مامەڵەیەکی کۆمپانیاکان لە دوای ڕێككەوتی 1-7-2025، بە بێ پڕۆسەی دووبارە ناساندنەوە ڕایی ناکرێت.

هاوكات لەبارەی گرنگی پرۆسەكەوە، بەڕێوەبەری تۆماری كۆمپانیاكان ئاشكرای كرد، بەدیجیتاڵكردنی داتا و زانیاریی كۆمپانیا تۆماركراوەكان بۆ پێدانی ژمارەی یەكەی بێهاوتا بە سەرجەم كۆمپانیاكان، لە داهاتوودا دەبێتە پێناسی دیجیتاڵی و بەكاردێت بۆ ڕێكار و كارەكانی ئەو كۆمپانیایانە.

ئەوەی پێویستە بیزانیت: پرۆسەی دووبارە ناساندنەوەی كۆمپانیاكان، پرۆسەیەكی بێ بەرامبەرە و فەرمانبەری بەرپرس لە بەڕێوەبەرایەتیی كۆمپانیاكانی پارێزگاكان وەك ئەركی وەزیفی خۆی ئەنجامی دەدات، خوازیاران دەبێت لەڕێگەی فۆرمی ئەلیكترۆنییەوە، نۆرە وەربگرن و لەكاتی دیاریكراودا ئامادە بن.