لە دەستپێکی جەنگەوە 10 هەزار هاونیشتمانی لە دەروازەی حاجی ئۆمەران گەڕاونەتەوە

ئاڤا نیوز

بەهۆی جەنگی نێوان ئیسرائیل و ئێران دەروازە سنوورییەکان لەنێوان ئێران و هەرێمی کوردستان چۆڵ بوونە، لە دەستپێکی جەنگەوە 10 هەزار هاونیشتمانی لە دەروازەی حاجی ئۆمەران گەڕاونەتەوە هەرێمی کوردستان.

وێنە گەورەکە: بەهۆی بەردەوامی هێرشەکانی ئیسرائیل بۆسەر ئێران، دەوترێت دەروازە سنوورییەکان وەکو سەردەمی کۆرۆنایان لێهاتووە، تەنیا ئەو هاووڵاتیانە دەبینرێن کە لە ئێرانەوە بۆ هەرێمی کوردستان دەگەڕێنەوە.

لێدوانی فەرمی: عەقید سالار تەحسین، بەڕێوەبەری نشینگە و پاسپۆرتی دەروازەکە بە ئاڤای وتووە، لە ڕۆژی هەینییەوە تا ئەم ئێوارەیە زیاتر لە 10 هەزار هاونیشتمانی کوردستان لە ئێران گەڕاونەتەوە. 

- ئێستا بە ڕێژەی  90% خەڵکی کوردستان گەڕاونەتەوە و تەنیا 10%ـیان ماون بگەڕێنەوە. 

- ڕۆژی هەینی کە جەنگ دەستی پێکرد پێنج هەزار و 200 هاونیشتمانی لە ئێرانەوە گەڕانەوە. هاوکات ڕۆژی دواتر چوار هەزار و 500 کەسی دیکە گەڕاونەتەوە و پرۆسەی گەڕانەوەکەش تاوەکو ئێستا بەردەوامە.