ژمارەیەك كۆچبەری كورد لە جەنگەڵێکی فەرەنسا دەكوژرێن و بریندار دەبن

ئاڤا نیوز

لە جەنگەڵێکی فەرەنسا شەڕ لەنێوان ژمارەیەك كۆچبەری كورد دروست دەبێت، بەهۆیەوە دوو كەس دەكوژرێن و دووانی دیكەش بریندار دەبن.

چیرۆكی سەرەكی: شەوی یەكشەممە 15ـی حوزەیرانی 2025، دەمەقاڵێ و شەڕ لەنێوان ژمارەیەك كەس دروست دەبێت كە بەپێی زانیارییەكان سەرجەمیان كوردن، شەڕەكە سەردەكێشێت بۆ بەكارهێنانی چەك و لە ئاكامدا دووانیان فیشەكیان بەردەكەوێت و  بە ناوەكانی كارزان و محەممەد گیانلەدەست دەدەن، دووانی دیكەش لەم شەڕ و پێكدادانە بریندار دەبن.

زانیاریی بەدەستهاتوو: ئاڤا لە زاری چەند چالاكوانێكی بواری مافی پەنابەران لە ئەوروپاوە زانیویەتی كە شایەدحاڵەكان باسیان لەوە كردووە، تەرمی دوو هاووڵاتییە كوژراوەكە تا ئێستاش لە جەنگەڵی دانکیخی فەرەنسایە و تەرمەكانیان لەلایەن تیمی بەرگریی شارستانی و دەزگا ئەمنییەكانەوە نەگوازراوەتەوە، بەڵام بریندارەكان لەلایەن كەسانی ئامادەبووی ڕووداوەكە بۆ نەخۆشخانە گواستراونەتەوە و ئێستا چارەسەریی پێویست وەردەگرن.

ئەوەی پێویستە بیزانیت: لە جەنگەڵی دانکیخی فەرەنسا لە ڕۆژئاوای ئەو وڵاتە، كۆچبەران هەوڵی گەیشتن بە بەریتانیا دەدەن بەو پێیە ناوچەیەكی دارستانی چڕ و حەشارگە و پێچ و پەنای زۆری لەخۆگرتووە، بەهۆی زۆری ژمارەی ئەو كۆچبەرانەی لەو جەنگەڵە دەمێننەوە، ڕێكخراوە خێرخوازییەكان ناچاربوون ژمارەیەك كامپ و خێمە بۆ كۆچبەران دروستبكەن و پێداویستە سەرەتاییەكانی ژیانیان بۆ دابین بكەن.

لەلایەكی دیكەوە: دوێنێ شەممە، هەر لە جەنگەڵی دانکیخی فەرەنسا، شەڕە تەقە لەنێوان كۆچبەران ڕوویدا، لە ئەنجامدا كۆچبەرێك كوژرا و پێنجی دیكەش بریندار بوون كە یەكێك لە بریندارەكان منداڵێكی تەمەن دوو ساڵانە، بەپێی زانیارییەكان و میدیا ناوخۆییەكانی فەرەنسا؛ كۆچبەرەكان بەڕەگەز سوودانین و لەچوارچێوەی نیشتەجێبووانی نێو كەمپ و خێمەكانی جەنگەڵی فەرەنسان بەر لەوەی بەڕێگەی قاچاخ بگەنە بەریتانیا.