مالیکی: ڕووبەڕووبوونەوەی ئیسرائیل سەرکەوتنە بۆ بەرەی مقاوەمە

ئاڤا نیوز

سەرۆکی هاوپەیمانیی دەوڵەتی یاسا، ڕایدەگەیێنێیت، ئەو پێشهاتانەی ئێستا لە ململانێی لەگەڵ ئیسرائیلدا هەن، "سەرکەوتنێکی ڕاستەقینەیە بۆ بەرەی مقاوەمە."

چیرۆکی سەرەکی: نووری مالیکی، سەرۆکی هاوپەیمانی دەوڵەتی یاسا لە میانی پێشکەشکردنی وتارێک لە ئاهەنگی جەژنی غەدیر لە بەغدا کە لەلایەن بزووتنەوەی بەشائیرەوە ڕێکخرابوو، تیشکی خستە سەر دۆخی ناوچەکە و ئەو جەنگەی ئێستا لەنێوان ئێران و ئیسرائیل دەستی پێکردووە.

لێدوانی فەرمی: مالیکی شەڕەکەی نێوان ئیسرائیل و ئێرانی بە ڕووبەڕووبوونەوەی نێوان "هێڵی ئیمام عەلی" و "زایۆنیزمی جیهانی" وەسف کرد. ڕایگەیاند، "ئەوەی ئەمڕۆ دەیبینین لە پەرەسەندنی ململانێکان، بەتایبەت لە غەززە و باشووری لوبنان، تەنانەت لەناو تەلئەبیبیشدا، سەرکەوتنێکی ڕاستەقینەیە بۆ بەرەی مقاوەمە." ئاماژەی بەوەشکرد کە "کوڕانی عەلی" توانیویانە ئەفسانەی "سوپای ئیسرائیل کە ناشکێت" تێکبشکێنن.

بە تەنیشت ئەو بابەتەوە: سەرۆکی هاوپەیمانیی دەوڵەتی یاسا، سەرکەوتنەکانی کۆماری ئیسلامیی ئێرانی بە "ئازایەتی و باوەڕبوونیان بە ڕەوایەتیی دۆزەکەیان" ناوبرد، و ڕەخنەی لە هەڵوێستی "هەندێک وڵاتی پاشگەزبووەوە" گرت کە پشتیوانیی ئیسرائیلیان کردووە.

لەلایەکی دیکەوە: مالیکی نیگەرانیی خۆی دەربڕی لە "بێدەنگیی نێودەوڵەتیی بەرامبەر ئەو کۆمەڵکوژییانەی دژی فەڵەستینییەکان ئەنجام دەدرێن"، و جەختی کردەوە کە "ئوممەتی ئیسلامی ئەمڕۆ داواکراوە کە پشتیوانی و پاڵپشتیی خۆڕاگران بکات، چونکە ئەمە شەڕی گەلێکی دیاریکراو نییە، بەڵکو شەڕی هەموو ئوممەتەکەیە."