فایلی خەڵک؛ گوندێکی پیرەمەگروون چوار ساڵە کێشەی ئاوی خواردنەوەیان هەیە

ئاڤا نیوز

گوندێکی ناحیەی پیرەمەگروون کێشەی ئاوی خواردنەوەیان هەیە و کێشەکەیان تەنیا بە 51 ملیۆن دینار چارەسەر دەکرێت، بەڵام پارێزگاری سلێمانی ئامادە نیە ئەو پارەیە خەرج بکات.

وێنە گەورەکە: دانیشتوانی گوندی حاجییان لە شارۆچکەی پیرەمەگروونی سلێمانی کێشەی ئاوی خواردنەوەیان هەیە، دەڵێن، چوار ساڵە خەریكی مامەڵە و نووسراوین كەچی لایەنی پەیوەندیدار ئامادە نییە بیرێكمان بۆ لێ بدات و لەو بێ ئاوییە ڕزگارمان بكات.

لێدوانی فەرمی: هاوڕێ سوورە كە دانیشتووی گوندەكەیە دەڵێت: هەموو مامەڵەیەكمان كردووە و ڕەزامەندیی لێدانی بیرمان وەگرتووە و تەنیا ئەوەی ماوە كە پارەكە تەرخان بكرێت كە بڕەكەی 51 ملیۆن دینارە، بەڵام پارێزگاری سلێمانی ئامادە نییە پارەكەمان بۆ دابین بكات.

- خەڵكی گوندەكە بە تانكەر ئاو دەهێنن و مەڕ و ماڵاتێكی زۆریشیان هەیە و لە بێ ئاوییدا پەكیان كەوتووە، ماڵەكان بیری ئاویان هەیە، بەڵام لە مانگی شەشەوە ئیتر ئاوی بیرەكان وشك دەكەن، ئەو ئاوەشی كە بە تانكەر دەیهێنن بە كەڵكی خواردنەوە نایێت و ناچار ئاوی دەبە دەكڕن.

لەلایەکی دیکەوە: ئاڤا میدیا پەیوەندی بە هەڤاڵ ئەبوبەكر، پارێزگاری سلێمانییەوە كرد، ئەو ڕایگەیاند، "نووسراومان بۆ وەزارەتی شارەوانی كردووە و دەبێت وەزارەتی شارەوانی لەڕێگەی وەزارەتی داراییەوە پارەكە تەرخان بكات".

هاوکات، پارێزگاری سلێمانی لەڕێگەی ئاڤا میدیاوە بەڵێن بە دانیشتووانی گوندەكە دەدات بەدواداچوون بۆ  بابەتەكە بكات و گوتی: ئەگەر بودجەمان بەردەست بێت داخڵی بودجەی خۆمانی دەكەین.

بەتەنیشت ئەم بابەتەوە: ئاری ئەحمەد، بەڕێوەبەری گشتیی ئاوی هەرێمی كوردستان لەسەر ئەم بابەتە بەڵێنی دا بەدواداچوونی ورد بۆ وەڵامی نووسراوەكە بكات و گوتیشی، "لە ئەنجامەكەی ئاگادارتان دەكەمەوە".