سەرۆکی ناوەندێکی توێژینەوەی عێراقی بۆ ئاڤا: شەڕ لە ئێران کاریگەری لەسەر هەڵبژاردنی پەرلەمان دەبێت

ئاڤا نیوز

سەرۆکی ناوەندێکی توێژینەوەی عێراقی دەڵێت، بەگوێرەی ڕێککەوتنەکان پاراستنی ئاسمانی عێراق لە ئەستۆی ئەمریکا دایە، باوەڕیشی وایە بەردەوامی شەڕی نێوان ئیسرائیل و ئێران کاریگەریی لەسەر بەڕێوەچوونی هەڵبژاردنی پەرلەمان دەبێت.

چیرۆکی سەرەکی: دوێنێ چوارچێوەی هەماهەنگی شیعەکان بە ئامادەبوونی سەرۆکوەزیرانی عێراق کۆبووەوە و ڕایگەیاند، هێرشەکانی ئیسرائیل بۆسەر ئێران سەرکۆنە دەکات و بۆ پشتیوانیی خۆڕاگری ئێرانیش داوای خۆپیشاندان دەکات.

لێدوانی فەرمی: د.حەیدەر بەرزنجی، سەرۆکی ناوەندی نارام سین بۆ گفتوگۆ و دیالۆگ لە میانی بەشداریکردنی لە گەشتی هەواڵەکانی کاتژمێر 9:00ـی بەیانی ئاڤا میدیا ئاماژەی بەوەکرد، لەئێستادا لێکتێگەیشتن لەنێوان گرووپە چەکدارەکان و حکومەتدا هەیە و حکومەت سیاسەتی دەرەوەی دەوڵەتی عێراق بەڕێوەدەبات گرووپەکانیش پابەندی دەبن، بەڵام ئەگەر گۆڕانکارییەکان زیاتر ببن لەوانەیە مەترسی لەسەر هەڵبژاردنی پەرلەمان دروستببێت، کە بڕیارە لە کۆتایی ئەمساڵدا بەڕێوەبچێت.

زانیاریی زیاتر: بە گوتەی بەرزنجی، بانگەشەی گرووپەکان بۆ دەرکردنی دیپلۆماتکارانی ئەمریکا لە بەغدا داواکارییەکە و حکومەت جێبەجێی ناکات، بەڵام ئەگەر ئەمریکا ڕاستەوخۆ بچێتە پاڵ ئیسرائیل لە شەڕەکەیدا دژی ئێران، بەدووری نازانن بنکە و بەرژەوەندییەکانی لە عێراق و وڵاتانی ناوچەکەدا بکەونە بەر هێرش و پەلاماردان.