ڕیگای بەحرکە بۆ ماوەی 15 ڕۆژ دادەخرێت

ئاڤا نیوز

 

شەقامی سەرەکی هەولێر - بەحرکە بۆ ماوەی 15 ڕۆژ دادەخرێت و هاتووچۆی شارەکە شەقامە جێگرەوەکان بۆ هاووڵاتیان دەستنیشان دەکات.

 

ڕاگەیێنراوی فەرمی: ئەمڕۆ دووشەممە 16-6-2025، بەڕێوەبەرایەتیی پۆلیسی هەولێر ئاگادارییەکی بڵاوکردەوە و ڕایگەیاند: ئەمڕۆ کاتژمێر حەوتی ئێوارە ڕیگای هەولێر – بەحرکە دادەخرێت و هۆکارەکەی کارکردن و نۆژەنکردنەوەیەتی.

 

ئەوەی پێویستە بیزانیت: لە بەرزە پردی شەقامی 120مەتری خێرا بە ئاراستەی بەحرکە، کارکردن لە ڕێگاکە بۆ ماوەی 15 ڕۆژ بەردەوام دەبێت. لە قوناغی یەکەم کارکردن لە سایدی هەولێر بەرەو بەحرکە تا سوڕانەوە یەکەمی بەحرکە دەبێت، دواتر قۆناغی دووەم لە سوڕانەوەی یەکەم تا پردی شەقامی 150 مەتریی خێرا دەستپێدەکات.

 

زانیاریی زیاتر: لە ماوەی داخرانی ڕێگاکە شوفێران دەتوانن ئەم رێگا جێگرەوانە بەکار بهێنن.
|
یەکەم: بۆ گەیشتن بە ناحیەی بەحرکە و بەڕێوەبەرایەتیی هاتوچۆی هەولێر، ڕێگای هەولێر - شەقڵاوە لە شەقامی 150 مەتری خێرا بەکار بهێنن.

دووەم: ڕێگەی کۆنی بەحرکە بەکاربهێنن. 

سێیەم: ڕێگای 150 مەتری لە گەزنە بۆ بەحرکە بەکاربهێنن.