دادگای فیدراڵی جەخت لە بڕیارێکی لەبارەی مووچەی پلە باڵاکان دەکاتەوە

ئاڤا نیوز

دادگای باڵای فیدراڵیی عێراق جەخت لەسەر هەڵوەشانەوەی بڕگەیەکی یاسای خانەنشینی پەیوەست بە پلە باڵاکان دەکات، و ئاماژە بۆ ئەوە دەکات 80%ی مووچەی خانەنشینی بۆ بەڕێوەبەرە گشتییەكان نادەستورییە.

 

وێنە گەورەکە: دادگای باڵای فیدراڵیی عێراق و دادگای پێداچوونەوەی فیدراڵی دان بە بڕیارەکانی یەکتر نانێن، لەسەر بڕگەیەکی یاسای خانەنشینی یەکگرتوو ژمار 9ی ساڵی 2014 کێشە دەکەوێتەوە نێوان.

 

بڵاوکراوەی فەرمی: بەگوێرەی هەوڵێکی دادگەی فیدراڵی، دادگەی باڵای فیدراڵی بەپێی بڕیاری ژمارە (232/فیدراڵی/2024) کە لە ڕێککەوتی 2024-11-13 دەریکردووە، بڕیاری لەسەر نادەستووریبوونی بڕگەی (هەشتەم) لە ماددەی (35)ی یاسای یەکگرتووی خانەنشینی ژمارە (9)ی ساڵی 2014 داوە.

 

ئەوەی پێویستە بیزانیت: بڕگەی (هەشتەم) لە ماددەی (35)ی کە لەلایەن دادگای باڵای فیدراڵییەوە هەڵوەشێنراوەتەوە، تێیدا هاتبوو: "بەڕێوەبەرە گشتییەکان لە سەرجەم فەرمانگەکانی دەوڵەتدا، شایستەی مووچەیەکی خانەنشینی دەبن کە لە 80%ی کۆی دوایین مووچە و دەرماڵەکانیان تێپەڕ نەکات، کە بەپێی حوکمەکانی ئەم یاسایە وەریانگرتووە".

ئەوەی لەوبارەیەوە دەگوترێت: ڕۆژی 4ـی حوزەیران دادگای پێداچوونەوەی فیدراڵی ڕایگەیاندبوو، ئەو بڕیارەی دادگای فیدراڵی نادەستوورییە و ئاماژە بۆ ئەوەش کردبوو کە دادگاکەیان بەرزترین دەستەی دادوەرییە لە عێراق و دادوەرییەکەی لەسەر ئەوە جێگیر بووە کە هەر حوکمێک یان بڕیارێک لەلایەن دادگای فیدراڵییەوە پێچەوانەی پسپۆڕیی کارییەوە دەربچێت، بە پووچەڵ دادەنرێت.

بۆچوونی لایەنی بەرامبەر: لە بەرامبەردا دادگەی باڵای فیدراڵیی عێراق لە ڕاگەیێنراوێکدا هەر ئەوکات ڕایگەیاند، بڕیارەکانی دادگەی باڵای فیدراڵی یەکلاکەرەوە و پابەندکەرن بۆ هەموو دەسەڵاتەکان، ئەویش بە پشتبەستن بە حوکمەکانی ماددەی (94)ی دەستووری کۆماری عێراقی ساڵی 2005.