گەشتیارانی دوورگەی کیش گەڕێنرانەوە

ئاڤا نیوز

 

کاروانێکی دیکەی ئەو هاووڵاتییانەی هەرێمی کوردستان کە لە دەرەوەی وڵات گیریان خواردبوو، گەڕێنرانەوە. ئەوان ژمارەیان 80 کەسە و لە دوورگەی کیش لە ئێران گیریان خواردبوو.

 

وێنە گەورەکە: دوای وەستانی گەشتە ئاسمانییەکان لە چەند وڵاتێکی ناوچەکە بەهۆی شەڕی ئێران و ئیسرائیل، ژمارەیەک گەشتیاری هەرێمی کوردستان لە دەرەوە گیریان خوارد و نەیانتوانی بگەڕێنەوە.

 

چیرۆکی سەرەکی: حکومەتی هەرێمی کوردستان بە هەماهەنگیی وەزارەتی ناوخۆ و فەرمانگەی پەیوەندییەکانی دەرەوە، لیژنەیەکی پێکهێناوە بۆ گەڕاندنەوەی ئەو هاونیشتمانییانەی لە دەرەوە گیریان خواردووە؛ لە ڕێگەی ژوورێکی ئۆپەراسیۆن لە ناوەندی هاوبەشی هەماهەنگیی قەیرانەکان، پەیوەندی بەو گەشتیارانەوە دەکرێت و کارئاسانی بۆ گەڕانەوەیان دەکرێت.

 

لێدوانی فەرمی: عەلی سەعید، بەڕێوەبەری داتا و زانیاری لە ناوەندی هاوبەشی هەماهەنگی قەیرانەکانی وەزارەتی ناوخۆ بە ئاڤای گوت: لەسەر فەرمانی سەرۆکوەزیران، مەسرور بارزانی کار بۆ گەڕانەوەی ئەو گەشتیارانە دەکەین، ئەمڕۆش کاروانێکی دیکەی گەشتیاران گەڕێنرانەوە کە لە دوورگەی کیشی وڵاتی ئێران گیریان خواردبوو، گەڕاندنەوەشیان بە ڕێگەی ئاوی و وشکانی بوو.

 

زانیاریی زیاتر: ئەو هاووڵاتییانە ژمارەیان 80 کەسە، کە چواریان خەڵکی پارێزگاکانی عێراقن و 76ـیان خەڵکی هەرێمی کوردستانن، بەشێکیان گەشتیار بوون و ئەوانی دیکەش قوتابیی بەشی پزیشکی بوون و لە لقی دوورگەی کیشی زانکۆی تاران دەیانخوێند.