بەشداریکردنی ئەمریکا لە جەنگی ئیسرائیل و ئێران لە ئانوساتە؛ جیهان چاوەڕێی بڕیاری ترەمپە

ئاڤا نیوز

بەشداریکردنی ئەمریکا لە جەنگی ئیسرائیل و ئێران لە ئانوساتدایە، ئەمریکا دەستی بە جووڵەی فڕۆکە و کەشتی جەنگی کردووە بەرەو ڕۆژهەڵاتی ناوەڕاست، ئێستاش دۆناڵد ترەمپ لە کۆبوونەوەیەک دایە بۆ بڕیاردان لەبارەی جەنگەکە.

وێنە گەورەکە: جەنگی ئیسرائیل و ئێران کە پێنج ڕۆژە هەڵگیرساوە لە فراوانبوونە، بەشداریکردنی ئەمریکا لە جەنگە لە ئانوساتدایە، ئەمریکا دەستی بە جووڵە کردووە و هەموو کەشتییە جەنگییەکانی لە دەوروبەری ڕۆژهەڵاتی ناوەڕاست کۆکردووەتەوە بۆ ئەوەی لە هەر ساتێکدا بێت دەستوەردان بکات، دەستیشی کردووە بە گواستنەوەی فڕۆکە جەنگییەکان بۆ ڕۆژهەڵاتی ناوەڕاست.

چیرۆکی سەرەکی: بەرەبەیانی ئەمڕۆ دۆناڵد ترەمپ کە بۆ بەشداریکردن لە کۆبوونەوەی گرووپی جی حەوت ( ئەمریکا، کەنەدا، بەریتانیا، فەرەنسا، ئیتاڵیا، ئەڵمانیا و ژاپۆن) لە کەنەدا بوو، بەخێرایی گەڕایەوە واشنتن، لە کاتژمێر 08:00ی ئەمشەویشەوە لەگەڵ ئەنجوومەنی ئاسایشی نەتەوەیی ئەمریکا لە کۆبوونەوەدایە لەبارەی جەنگی ئیسرائیل و ئێران.

لێدوانی فەرمی: دۆناڵد ترەمپ ئەمڕۆ ڕایگەیاند: "بەهیچ شێوەیەک نەمگوتووە ئاگربەستم دەوێت، کەس بۆ ڕاگرتنی جەنگەکە تەلەفۆنم بۆ نەکات، ئێمە دەمانەوێت ئێران بەتەواوی خۆی بەدەستەوە بدات". ئێوارەی ئەمڕۆش پەیامێکی نوێی بۆ ئێران نارد و داوای کرد ئێران بێ مەرج خۆی بەدەستەوە بدات.

ئەوەی لەبارەیەوە دەگوترێت: سێ بەرپرسی ئەمریکی بە ئاژانسی ئاکسیۆسی ئەمریکییان ڕاگەیاندووە، ترەمپ بەجددی بیر لە بەشداریکردنی ئەمریکا لە شەڕەکە دەکات، بەڵام هێرشی ئەمریکا سنووردار دەبێت و تەنیا بۆ سەر دامەزراوە ئەتۆمییەکان دەبێت بەتایبەت دامەزراوەی ژێرزەمینیی پیتاندنی یۆرانیۆم لە فۆردۆ کە 800 مەتر لەژێر زەوییە و ئیسرائیل هیچ بۆمبێکی نییە بتوانێت زیان بەم دامەزراوەیە بێنێت.

ئەوەی پێشبینی دەکرێت: دوایین جووڵەکانی ئەمریکا لە ڕۆژهەڵاتی ناوەڕاست و قسەکانی ترەمپ ئاماژە بەوە دەکەن لەگەڵ ڕاوێژکارەکانی لە گفتوگۆدایە چۆن بەشداری لە جەنگەکە بکەن لە بەرژەوەندیی ئیسرائیل. ئیسرائیلیش بەفەرمی داوای کردووە ئەمریکا بەشداری لە جەنگەکەدا بکات.