ژمارەیەک بەندکراو بە لێبوردنی تایبەت ئازاد دەکرێن

ئاڤا نیوز

 

ئەو بەندکراوانەی نەخۆشی درێژخایەنیان هەیە و دۆخی تەندروستییان خراپە، دوای هەڵسەنگاندنی دۆخیان لەلایەن لیژنەی تایبەتی سەرۆکایەتیی هەرێمی کوردستانەوە ئازاد دەکرێن.

 

چیرۆکی سەرەکی: لیژنەیەکی تایبەت لە سەرۆکایەتیی هەرێمی کوردستان پێکهێنراوە بەمەبەستی هەڵسەنگاندن و پشکنینیی تەندروستیی بۆ ئەو بەندکراوانەی نەخۆشی درێژخایەنیان هەیە و لەکاتێکدا کە حوکمی لەسێدارەدانیان بەسەردا سەپێنراوە یاخود سزای ئەبەدیان هەیە، دوای هەڵسەنگاندن بۆ دۆخی تەندروستییان بڕیار لە چارەنووسیان دەدرێت.

 

زانیاریی تایبەت: سەرچاوەیەکی ئاگادار لە لیژنە تایبەتەکەی سەرۆکایەتیی هەرێمی کوردستان بە ئاڤا میدیای ڕاگەیاند: هەفتەی داهاتوو لیژنەکە کۆبوونەوەیەک دەکات، بەمەبەستی ئەوەی بڕیاری ئازادکردنی قۆناغی سێیەمی ئەو بەندکراوانە بدات کە دۆخی تەندروستییان خراپە. 

 

زانیاریی زیاتر: تا ئێستا بە دوو قۆناغ زیاتر لە 50 بەندکراو کە نەخۆشی درێژخایەنیان هەبووە، بە بڕیاری لیژنە تایبەتەکەی سەرۆکایەتیی هەرێمی کوردستان ئازاد کراون.

 

زانیاریی بەدەستهاتوو: ناوی 99 نەخۆشی درێژخایەنی دیکە، لەلای لیژنە تایبەتەکەی سەرۆکایەتیی هەرێمی کوردستانە، بۆ ئەوەی هەڵسەنگاندن بۆ دۆخیان بکرێت و دواتر بەپێی دۆخی تەندروستییان بڕیار لەسەر ئازادکردنیان بدرێت.