وەزارەتی ئاوەدانکردنەوە کار لەسەر جێبەجێکردنی 183 پڕۆژەی ڕێگاوبان دەکات

ئاڤا نیوز

وەزارەتی ئاوەدانکردنەوە بە تێچووی نزیکەی دوو تریلیۆن دینار، 183 پڕۆژەی وەک پلانی ئەمساڵ پێشنیاز کردووە، دوای پەسەندکردن دەخرێنە بواری جێبەجێکردن.

وێنە گەورەکە: سەرەڕای هەموو ئاستەنگە داراییەکان و ڕێگرییەکان لە ماوەی تەمەنی کابینەی نۆیەمدا، سەدان پڕۆژەی خزمەتگوزاری نوێ دروستکراون و تەواوکراون، ئەم هەنگاوە گرنگ و ستراتیژییەی لە چوارچێوەی چەند شارێکدا نەبوو، بەڵکو دەستی ئاوەدانی گەیشتووەتە سەدان گوند و بەستراونەتەوە بە شارەکان.

لێدوانی فەرمی: د. ئاگرین عەبدوڵڵا، بریکاری وەزارەتی ئاوەدانکردنەوە و نیشتەجێکردن بە ئاڤای وت، "بۆ ساڵی 2025 پێشنیازی 183 پڕۆژەی ڕێگاوبانمان داوەتە وەزارەتی پلاندانان بە بودجەی یەک تریلیۆن و 978 ملیار 920 ملیۆن دینار، دوای پەسەندکردن و تەرخانکردنی بودجە کار لەسەر جێبەجێکردنیان دەکەین."

-  "53%ـی پڕۆژەکان لە هەولێر و دهۆک دەبن، سلێمانی، هەڵەبجە، ئیدارەکانی ڕاپەڕین و گەرمیان 47%ـی پڕۆژەکانیان بەردەکەوێت."

ئەوەی پێویستە بیزانیت: لە کابینەی نۆیەمی حکومەتی هەرێمی کوردستان نزیکەی 600  پرۆژەی ڕێگاوبان لە بواری جۆراوجۆر لە سەرجەم ناوچەکان لە هەرێمی کوردستان جێبەجێکراون، لە ماوەی دوو ساڵی ڕابردوو 11 پڕۆژەی گەورە بە تێچووی 30 ملیار و 792 ملیۆن دینار تەواوکراون.