کوردێک ژمارەی پێوانەیی لە سەرکەوتن بەسەر شاخدا تۆمار دەکات

ئاڤا نیوز

محەممەد باوەکری شاخەوان ژمارەی پێوانەیی تۆمار کرد لە سەرکەوتن بەسەر سێ لووتکەی شاخی کلیمنجارۆ بە کەمترین کات. پێشتر هیچ شاخەوانێک نەیتوانیوە ئەو کارە بکات.

چیرۆکی سەرەکی: محەممەد باوەکر، شاخەوانی هەرێمی کوردستانە و تەمەنی 67 ساڵە ، ڕۆژی 16ی ئەم مانگە بەسەر لووتکەی ئۆهۆرۆ لە شاخی کلیمانجارۆ سەرکەوت و ئاڵای کوردستانی لەسەر لووتکەی شاخەکەدا بەرز کردەوە، ئەم شاخەوانە لە یەک گەشتدا توانی بە 10 کاتژمێر بەسەر سێ بەرزترین لووتکەی ئەم شاخەدا سەربکەوێت.

لێدوانی فەرمی: ئازاد گەردی، سەرۆکی گرووپی شاخەوانیی هەڵۆ بە ئاڤای گوت: پێشتر هیچ شاخەوانێک نەیتوانیوە بە 10 کاتژمێر بەسەر ئەم سێ لووتکەی شاخەدا سەربکەوێت.

ئەوەی پێویستە بیزانیت: کلیمانجارۆ بەرزترین شاخە لە کیشوەری ئەفریقیا و دەکەوێتە باکووری ڕۆژهەڵاتی وڵاتی تەنزانیا، بەرزییەکەی پێنج هەزار و 895 مەترە.

ژمارەکان وادەڵێن: سێ بەرزترین لووتکەی شاخەکە ئەمانەن: 

ئۆهۆرۆ: بەرزییەکەی پێنج هەزار و 895 مەترە.

ستیلا: بەرزییەکەی پێنج هەزار و 756 مەترە.

کلیمانس: بەرزیەکەی پێنج هەزار و 681 مەترە.

محەممەد باوەکر، شاعیر و نووسەری هەرێمی کوردستانە و ژمارەیەک کتێبی چاپ و بڵاوکردووەتەوە، لە ساڵی 2018 ەوە لەڕێگەی گرووپی شاخەوانی هەڵۆ دەستی بە شاخەوانی کردووە، گەشتی ژمارەیەک وڵاتی کردووە، تا ئێستا دوو کتێبیشی دەربارەی شاخەوانی چاپ کردووە.