بڕیاری دامەزراندنی دەرچووانی کۆلێژی پزیشکی دەدرێت

ئاڤا نیوز

ئەنجوومەنی وەزیرانی هەرێمی کوردستان بڕیاری بۆ دامەزراندنی دەرچووانی پزیشکی دەرکرد.

وێنە گەورەکە: ئەمڕۆ 18-6-2025، بەسەرپەرشتی سەرۆکوەزیران مەسرور بارزانی، ئەنجوومەنی وەزیرانی هەرێمی کوردستان لەسەر سێ بڕگە کۆبووەوە، بڕگەکان پێکهاتبوون لە شەڕ و ئاڵۆزییەکانی ناوچەکە و کاریگەرییەکانی لەسەر هەرێمی کوردستان، لێخۆشبوونی سزای سەرپێچی هاتووچۆ بەڕێژەی 20%، پرسی دامەزراندنی دەرچووانی کۆلێژی پزیشی.

لێدوانی تایبەت: پێشەوا هەورامانی، وتەبێژی حکومەتی هەرێمی کوردستان، بە ئاڤا میدیای ڕاگەیاند: ئەمڕۆ لە کۆبوونەوەی ئەنجوومەنی وەزیراندا، بڕیاری دامەزراندی دەرچووانی کۆلێژی پزیشکی ساڵی 2023-2024 درا.

وتەبێژی حکومەتی هەرێمی کوردستان وتیشی: دەرچووانی کۆلێژی پزیشکی لەسەر میلاکی وەزارەتی تەندروستی دادەمەزرێن.

ڕاگەیێنراوی فەرمی: بەپێی ڕاگەیێنراوی کۆبوونەوەی ئەنجوومەنی وەزیران. لە بڕگەی کۆتایی کۆبوونەوە، سامان بەرزنجی وەزیری تەندروستی و ئامانج ڕەحیم سکرتێری ئەنجومەنی وەزیران، بابەتی دامەزراندنی دەرچووانی کۆلێژی پزیشکی گشتییان خستەڕوو.

لە دوای گفتوگۆ، ئەنجوومەنی وەزیران پێشنیازەکەی پەسەند کرد و بڕیاری دامەزراندنیان لەسەر میلاکی وەزارەتی تەندروستی دا.

ئەوەی پێویستە بیزانیت: ئەنجوومەنی وەزیران، وەزارەتەکانی دارایی و ئابووری و تەندروستی و ئەنجوومەنی گشتی ڕاژەی ڕاسپارد ڕێکاری پێویست بۆ دامەزراندنیان بگرنەبەر.