ئاهەنگی نەورۆز بە بەشداریی سەرۆكوەزیران بارزانی لە ئاكرێ بەڕێوەدەچێت

ئاڤا نیوز

کەرنەڤاڵی جەژنی نەورۆز لە ئاكرێ بە بەشداریی سەرۆكوەزیران بارزانی و دەیان باڵیۆز و کونسوڵ و میوانی بیانی و هەزاران کەس بەڕێوەدەچێت.

ئەوەی ئێستا ڕوودەدات: سەرۆکوەزیرانی بارزانی بە جلوبەرگی کوردییەوە گەیشتووەتە سەرێ گرێ، شوێنی کەرنەڤاڵەکە و پێشوازی لە باڵیۆز و کونسوڵ و میوانانی بیانی دەکات.

زانیاریی زیاتر: بڕیارە دوای بەربانگ کەرنەڤاڵێکی گەورە بە بەشداریی ژمارەیەکی زۆر لە باڵیۆز و کونسوڵ و نێردە و دیپلوماتی وڵاتان لە عێراق و هەرێمی کوردستان بەڕێوەبچێت و سەرۆکوەزیران بارزانیش پەیامی دەبێت.

ئەوەی پێویستە بیزانیت: ئاکرێ کە بە پایتەختی نەورۆز ناسراوە، بۆ ئەمساڵ حکومەتی هەرێمی کوردستان بەفەرمی سەرپەرشتی کەرنەڤاڵەکە دەکات.

ئەمەش بزانە: ئەمساڵ ئاهەنگەکە جیاواز دەبێت، دوو هەزار مەشخەڵ دادەگیرسێنرێن، ئاگر لەسەر سێ لووتکە چیا (کەلێ، کەلە کەڤن و تیشی) دادەگیرسێنرێت. هەروەها کۆمەڵێک یاریی ئاگرین ئامادەکراون کە یەکەمجارە لە هەرێمی کوردستان و عێراق بەکاربهێنرێن.