پێنتاگۆن چاوەڕێی بڕیاری ترەمپە بۆ جەنگی ئیسرائیل و ئێران

ئاڤا نیوز

وەزیری بەرگریی ئەمریکا، ڕایگیاند پێنتاگۆن چەند بژاردەیەکی سەبارەت بە هەڵوێستی ئەمریکا لە شەڕی نێوان ئێران و ئیسرائیل خستووەتە بەردەم دۆناڵد ترەمپ، سەرۆکی ئەمریکا. چاوەڕێین ئەو بڕیار بدات.

وێنە گەورەکە: ماوەی شەش ڕۆژە هێرشی مووشەکی و درۆنی نێوان ئیسرائیل و ئێران بۆ سەر یەکتر بەردەوامە و چاوەکان لەسەر ئەوەن ئەمریکا بڕیاری هاتنە ناو جەنگەکە بدات، پێنتاگۆن چەند بژاردەیەکی خستووەتە بەردەم ترەمپ و چاوەڕیی بڕیاری ترەمپن.

لێدوانی فەرمی: پیت هێگێس، وەزیری بەرگریی ئەمریکا لە میانەی وەڵامدانەوەی پرسیارەکانی ئەندامانی کۆنگرێسی ئەمریکا، گوتی ترەمپ بڕیار لەسەر بژاردەکان دەدات و پێنتاگۆن جێبەجێی دەکات. سەبارەت بە هاوکاریی ئەمریکاش بۆ ئیسرائیل گوتی، ترەمپ بڕیار لەسەر ئەوە دەدات کە ئایا فڕۆکە و بۆمب بۆ تێکشکاندنی دامەزراوە ئەتۆمییەکانی ئێران دەداتە ئیسرائیل یان نا.

زانیاریی زیاتر: وەزیری بەرگریی ئەمریکا گوتیشی ئەوپەڕی پارێزگاریکردن بۆ هێزەکانی ئەمریکا لە ڕۆژهەڵاتی ناوەڕاست دابین کراوە.