سەرۆكوەزیران بارزانی: کێشەی مووچە لە چەند ڕۆژی داهاتوودا چارەسەر دەبێت

ئاڤا نیوز

سەرۆکوەزیران بارزانی بەبۆنەی جەژنی نەورۆز مژدەی بە خەڵکی هەرێمی کوردستان دا لە چەند ڕۆژی داهاتوودا کێشەی مووچە لەگەڵ حکومەتی عێراق چارەسەر دەکەن.

چیرۆکی سەرەکی: سەرۆکوەزیران مەسرور بارزانی بە جلوبەرگی کوردی بەشداریی لە کەرنەڤاڵی جەژنی نەورۆز لە ئاکرێ کرد و گوتارێکی پێشکەش کرد، وێڕای پیرۆزبایی تێیدا باسی پرسی مووچەی کرد.

لێدوانی فەرمی: لە سەرەتای قسەکانیدا سەرۆکوەزیران بارزانی سوپاسی خۆڕاگریی خەڵکی کوردستانی کرد بەرامبەر کێشەکان بەتایبەت نەبوونی مووچە و گوتی: هەرچەندە گرفتی ئێمە تەنیا مووچە نییە، بەڵام ژیانی خەڵکی پێوە گرێدراوە، بۆیە هەموو هەوڵی خۆمان داوە ئەم بابەتە چارەسەر بکرێت".

خاڵە ئەرێنییەکان: سەرۆکوەزیران بارزانی بە ئاماژەکردن بەوەی "دەستی زۆر خراپ هەبوون بۆ تێکدانی بابەتی ناردنی مووچە و دابینکردنی بودجە" بۆ خەڵکی کوردستان، بەڵام دڵنیایی دا لەوەی لەگەڵ سەرۆکوەزیرانی عێراق لە گفتوگۆدایە بۆ چارەسەرکردنی کێشەکە و گوتی: "بەڵێنی پێداوین لە چەند ڕۆژی داهاتوودا بابەتەکە بەتەواوی چارەسەر بکرێت و چیتر نەبێتە گرفت."

لەلایەکی دیکەوە: سەرۆکوەزیران پەیمانی دا بەرگری لە ماف و دەستکەوت و کیانی هەرێمی کوردستان بکەن و ڕووبەڕووی ستەم و بێدادی و نادادپەروەری و گەندەڵی ببنەوە.

گۆشەیەکی دیکە: سەرۆکوەزیران بارزانی باسی لافاوەکەی دوێنێی دهۆک و زاخۆی کرد و وێڕای سەرەخۆشی لە کەسوکاری قوربانییان، بەڵێنی دا زیانلێکەوتووان قەرەبوو بکەنەوە.