نزیکەی 700 هەزار تۆن بەرووبوومی کشتوکاڵی لە هەولێرەوە ڕەوانەی عێراق دەکرێت

ئاڤا نیوز

ئەمساڵ نزیکەی 200 هەزار تۆن بەرووبوومی کشتوکاڵی پارێزگای هەولێر، لە باشوور و ناوەڕاستی عێراق بەبازاڕ کراوە و پێشبینی دەکرێت تا کۆتایی ساڵ بڕەکەی بگاتە نزیکەی 700 هەزار تۆن.

وێنە گەورەکە: لە چوارچێوەی چاکسازییەکانی کابینەی نۆیەمی حکومەتی هەرێمی کوردستان و ستراتیژیەتی حکومەت بۆ هەمەجۆرکردنی ئابووری و سەرچاوەکانی داهات و بوونیادنانی ژێرخانێکی بەهێزی ئابووری، گرنگی تایبەت بە کەرتی کشتوکاڵی و بەبازاڕکردنی بەرووبوومی ناوخۆیی دراوە، بۆ ئەمەش کار لەسەر ئەوە کراوە ئەو بەرووبوومانەی لە پێداویستی ناوخۆ زیاترن لە بازاڕەکانی عێراق و دەرەوە بەبازاڕ بکرێن.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت: ئەمساڵ 18 هەزار و 300 پشتگیریمان بە جووتیاران داوە بۆ بەبازاڕکردنی بەرووبوومی کشتوکاڵی لە باشوور و ناوەراستی عێراق، زیاتر لە 90 هەزار تۆن بەرووبوومی زستانە و زیاتر لە 100 هەزار تۆن بەرووبوومی کشتوکاڵی لە هەولێرەوە ڕەوانەی باشوور و ناوەڕاست کراوە. پێشبینی دەکرێت تا کۆتایی ئەمساڵ نزیکەی 700 هەزار تۆن بەرووبوومی کشتوکاڵی پارێزگای هەولێر ڕەوانەی باشوور و ناوەڕاست بکرێت.

ئەو بەرووبوومە زستانیانەی ڕەوانەی باشوور و ناوەڕاست کراون ئەمانەن: 
کەلەرم، چەوەندەر، شێلم، قەرنابیت و سێوی ژێر زەوەی.

ئەو بەرووبوومە هاوینیانەی ڕەوانەی باشوور و ناوەڕاست دەکرێن ئەمانەن: 
پیاز، پەتاتە، کودی، خەیار، شوتی، گندۆرە، تەماتە، قەیسی، خۆخ، باینجان، بیبەر و لۆبیا.

گۆشەیەکی دیکەی دیمەنەکە: لە سەرەتای ئەمساڵەوە نزیکەی 40 هەزار تۆن بەرووبوومی کشتوکاڵی پارێزگای هەولێر لە ناوخۆ بەبازاڕ کراوە.