نەتەوە یەكگرتووەكان بەدواداچوون بۆ گرفتە ئیداری و ئەمنییەكانی كەركووك دەكات

ئاڤا نیوز

نێردەی تایبەتی نەتەوە یەكگرتووەكان لە عێراق، ئامادەیی دەردەبڕێت بۆ هاریكاریكردنی لایەنە سیاسی و ئیدارییەكانی پارێزگای كەركووك لە چارەسەركردنی پرسە ئیداری و ئەمنییەكانی پارێزگاكە.

چیرۆكی سەرەكی: ئەمڕۆ پێنجشەممە 19-6-2025، محەممەد ئەلحەسان، نێردەی تایبەتی نەتەوە یەكگرتووەكان لە عێراق، بۆ جاری دووەم سەردانی شاری كەركووكی كرد و لەگەڵ بەشێك لە لایەنە سیاسی و ئیدارییەكانی پارێزگاكە دیداری کرد.

بابەتە ستراتیژییەكە: نێردەی نەتەوە یەكگرتووەكان لە عێراق، مەبەستیەتی لەنزیكەوە ئاگاداری گرفتەكانی پارێزگای كەركووك بێت لەوانەش؛ كێشەی زەویوزار، ناهاوسەنگی لە پۆستە ئیداری و ئەمنییەكانی پارێزگای كەركووك و حكومەتی خۆجێیی كەركووك، پاڵپشت بە ماددە دەستوورییەكان و یاسا كارپێكراوەكان، هاریكار بێت لە پێشكەشكردنی چارەسەریی بۆ گرفتەكانی پارێزگاكە.

لێدوانی فەرمی: محەممەد ئەلحەسان، نێردەی تایبەتی نەتەوە یەكگرتووەكان لە عێراق، لە كۆنفرانسێكی ڕۆژنامەوانیدا ڕایگەیاند، پارێزگای كەركووك بەهۆی لەخۆگرتنی پێكهاتە نەتەوەییەكانی عێراق، دەكرێت وەك وێنەیەكی بچووككراوەی عێراق وەسف بكرێت و ئەم تایبەتمەندییەش ببێتە هۆكارێكی بەسوود بۆ پەرەپێدانی پارێزگاكە.

ئاماژەی بەوەشكرد، كەركووك لەڕووی سەرچاوەی داهات و پێشخستنی گەشتیاری دەكرێت ڕۆڵێكی باشتری هەبێت، نەتەوە یەكگرتووەكان پابەندە بەوەی كە ڕۆڵی ئەرێنی بگێڕێت لە چارەسەركردنی گرفتەكان، لەچوارچێوەی پرۆگرامێكی درێژخایەنی نەتەوە یەكگرتووەكان بۆ هاریكاریكردنی عێراق و پەرەپێدانی سەرجەم پارێزگاكان.