ئێران چۆن ئیسرائیلی شۆک کرد؟

ئاڤا نیوز

 

جەنگی نێوان ئیسرائیل و ئێران بەرەبەرە گەورەتر و فراوانتر و خوێناوی تر دەبێت، بەرەبەیانی ئەمڕۆ بڵێسەی ئاگر زیاتر پەرەی سەندەوە و ئێران بە جۆرە مووشەكی جیاواز لە ڕۆژانی ڕابردوو دەستی بە بۆردوومانکردنی ئیسرائیل كرد.

چیرۆکی سەرەکی: بەرەبەیانی ئەمڕۆ پێنجشەممە، ئێران بە جۆرە مووشەكی جیاواز لە ڕۆژانی ڕابردوو دەستی بە بۆردوومانکردنی ئیسرائیل كرد و بۆردوومانەکەش گەورە و وێرانکەر بوو، بەجۆرێک هێرشی کردە سەر نەخۆشخانەیەکی تایبەت بە سەربازانی برینداری شەری غەززە و سوپای پاسدارانیش لەبارەی هێرشەکە وتیان، ئامانجی سەرەکیی هێرشەکە، بارەگای گەورەی فەرماندەیی و ناوەندی هەواڵگریی سوپای ئیسرائیل بووە کە دەکەوێتە تەنیشت نەخۆشخانەکە.

کاریگەری و لێکەوتەکان: هێرشکردنە سەر نەخۆشخانەیەك بوو لە ئیسرائیل، بەمەش پێدەچێت كاردانەوەكانی ئیسرائیل لە ئەمڕۆ بەدواوە تووندتر و بۆردوومانەكانی بۆ خاكی ئێران وێرانكەرتر بن، چونکە ئیسرائیل هەر زوو هەڕەشەی تۆڵەسەندنەوە و هێرشی كوشندەی كرد.

لێدوانی فەرمی: یسرائیل كاتز، وەزیری بەرگریی ئیسرائیل ڕایگەیاند، من و سەرۆکوەزیرانی ئیسرائیل فەرمانمان كرد بە چڕكردنەوەی هێرشەکان بۆ سەر ئامانجە ستراتیژی و ئامانجە حکومییەکان لە تاران، بۆ نەهێشتنی هەڕەشەکانیان و لەناوبردنی ڕژێمەكەیان، ئێران بەمەبەست نەخۆشخانە و باڵەخانەكانی نیشتەجێبوون لە ئیسرائیل دەکاتە ئامانج.

ئەوەی لەبارەیەوە دەگوترێت: ئێستا بڵێسەی ئاگری جەنگەكە زیاتر بووە و ئێران دەڵێت: مووشەكی زۆر جیاوازترم لەوەی ئەمڕۆ ماوە دژی ئیسرائیل بەكاریبهێنم، ئیسرائیلیش دەڵێت: باجی بۆردومانەكەی ئەمڕۆ دەدەن.

زانیاریی زیاتر: چەند فەرماندەیەکی سوپای پاسداران بە میدیاکانی وڵاتەکەیان گوتووە:  ئامانجی سەرەکیی هێرشەکەی ئەمڕۆمان بارەگای سەرەکی فەرماندەیی و ناوەندی هەواڵگریی سوپای ئیسرائیل بووە کە دەکەوێتە تەنیشت نەخۆشخانەکە.

٠ ناوەندەكە شوێنی مانەوەی هەزاران کارمەندی سەربازی و سیستەمی فەرماندەیی دیجیتاڵی و ئۆپەراسیۆنە ئەلیکترۆنییەکانی سوپای ئیسرائیلە.

٠ میدیاکانی ئیسرائیلیش دەڵێن: بەهۆی هێرشەکانی ئەمڕۆ نزیکەی دوو هەزار خێزان بێ ماڵ و حاڵ بوون و شووقە و خانووەکانیان داڕماون.

٠ سوپای پاسداران لێدوانی لەبارەی هێرشەکان داوە و  دەڵێت: بە وردییەکی بێوێنە دەزگای هەواڵگریی سوپای ئیسرائیلیان بۆردوومان کردووە. 

ڕاگەیێنراوی فەرمی: وەزارەتی تەندروستیی ئیسرائیل ڕایگەیاند: بەهۆی هێرشەکەوە 271 کەس بریندار بوون، ئاماژە بە کوژرانی هیچ کەسێکیش نەکراوە.

٠ کەناڵ 12ی ئیسرائیلی ڕایگەیاندووە کە بەهۆی هێرشەکان باڵەخانەیەک لە باشووری ئیسرائیل داڕماوە، بەهۆیەوە سێ کەس گیانیان لەدەست داوە و نزیکەی 50 کەسیش بریندار بوون.