میدیای ئیسرائیل: 18 کەس لە هێرشەکەی ئەمڕۆی ئێران بۆ سەر بێرشیا بریندار بوون

ئاڤا نیوز

 

ئێران بە مووشەکی دوورهاوێژ جارێکی دیکە ناوەڕاستی ئیسرائیل بە ئامانج دەگرێت. 

 

ڕاگەیێنراوی فەرمی: بەرەبەیانیی ئەمڕۆ ئێران لە ڕێگەی مووشەکی دوورهاوێژەوە هێرشی کردە سەر ناوچەی بێرشیا لە باشووری ئیسرائیل و زیانێکی زۆری ماددی بە ناوچەکە گەیاند. بەگوێرەی میدیای ئیسرائیل نزیکەی 18 کەس لە هێرشەکەی ئێران بریندار بوون.

 

کەمێک پێش ئێستا چی ڕوویدا: میدیاکانی ئیسرائیل بڵاویانکردەوە، ئێران هێرشێکی دیکەی بۆ سەر ئیسرائیل دەستپێکردەوە و زەنگی ئاگادارکردنەوە لە بەشێک لە شارەکانی ئەو وڵاتە لێدەدرێت.

 

پێشتر: حیزبوڵڵای عێراق هەڕەشە لە ئەمریکا دەکات و دەڵێت: "مووشەکی دژە فڕۆکەمان هەیە". هۆشداریش دەدات لە چوونی ئەمریکا بۆ ناو جەنگی ڕاستەوخۆ لەگەڵ ئێران.

 

بە تەنیشت ئەم بابەتەوە: میدیاکانی ئێران بڵاویانکردەوە، هێزە ئەمنییەکانی ئێران توانیان نزیکەی دوو هەزار دزەپێکەری ئیسرائیل کە سیخووڕیان بۆ دەزگای هەواڵگری ئەو وڵاتە کردووە دەستگیرکراون.

 

 

- سوپای ئیسرائیل بۆردوومانێکی چڕی بۆ سەر ناوچەی لەویزانی لە باکووری ڕۆژهەڵاتی تاران دەستپێکردووە و بەگوێرەی زانیارییە سەرەتاییەکان چەند بنکەیەکی سەربازی بە ئامانجگیراون. 

- بەگوێرەی بڵاوکراوەی بەشێک لە میدیا ئێرانییەکان: دەنگی سێ تەقینەوەی گەورە لە باشوور و ڕۆژئاوای تاران بیستراون بەڵام تاوەکو ئێستا دیار نییە ئەو شوێنانەی کراونەتە ئامانج ناوەندی سەربازی بوون یاخود باڵەخانەی نیشتەجێبوون. 

- هاوکات لەگەڵ بوردوومانی ئێران، سیستمی دژە مووشەکی لە چەند ناوچەیەکی دیکەی ئێران چالاکبووە و بەرپەرچی ژمارەیەک هێرشی ئیسرائیلیان داوەتەوە. 

هاوکات؛ میدیاکانی ئیسرائیل بڵاویان کردووەتەوە: فرۆکەیەکی بێفڕۆکەوان لە ئاسمانی حەیفا خراوەتە خوارەوە. 

وەزارەتی بەرگری ئیسرائیل ڕایگەیاند: ئەمریکا 14 فڕۆکەی سەربازی بە تەواوی کەرستەی سەربازییەوە ناردووەتە ئیسرائیل. 

وەزیری دەرەوەی نەرویج ڕایگەیاندووە: مووشەکێک لە نزیک شوینی مانەوەی باڵیۆزی نەرویج لە ئیسرائیل کەوتووەتە خوارەوە.