ئێران کامێرای چاودێریی ماڵان بەکاردەهێنێت بۆ سیخوڕیکردن لە ئیسرائیل

ئاڤا نیوز

لەچوارچێوەی بەردەوامی جەنگی نێوان ئیسرائیل و ئێران، ئێران کامێرای تایبەتی چاودێری ئەمنیی ماڵان لە ئیسرائیل بەکاردەهێنێت بۆ کۆکردنەوەی زانیاریی هەواڵگری.

 

چیرۆکی سەرەکی: ماوەی هەشت ڕۆژە جەنگی نێوان ئیسرائیل و ئێران بەردەوامە، تادێت قەبارەی زیانە مرۆیی و ئابوورییەکان فراوانتر دەبێت، هەردوولا بەچڕی پێگە سەربازی و ئەمنییەکانی یەکتر بە ئامانج دەگرن، لەو نێوەندەشدا ڕێگای جیاواز بە سیخوڕیکردن بەسەر یەکتری بەردەوامە.

 

زانیاریی بەدەستهاتوو: پێگەی بلومبێرگی ئەمریکی ئاشکرایکردووە، بەرپرسێکی پێشووی ئاسایشی ئەلیکترۆنی ئیسرائیل چەند ڕۆژێک لەمەوبەر لە ڕادیۆی گشتیی ئیسرائیل دەرکەوت و هۆشدارییەکی تووندی بڵاوکردەوە و داوای لە ئیسرائیلییەکان کرد، کامێرای چاودێری ماڵەوە بکوژێننەوە یان وشەی نهێنی بگۆڕن.

 

لێدوانی فەرمی: ڕافایێل فرانکۆ، جێگری پێشووی بەڕێوەبەری گشتیی بەڕێوەبەرایەتیی نیشتمانیی سایبەری ئیسرائیل دەڵێت، "لە ماوەی دوو سێ ڕۆژی ڕابردوودا، ئێرانییەکان هەوڵیانداوە دەستیان بە کامێرای چاودێری تایبەت بگات، بۆ ئەوەی تێبگەن چی ڕوویداوە.

 

ئەمەش بزانە: پەرەسەندنی هێرشەکان لە هەینی ڕابردووەوە (13ی حوزەیران) زیادبوونی هێرشە ئەلیکترۆنییەکانی لەخۆگرتووە، پێشووتر دەزگای فەرمی پەخشی ئێران بڵاویکردەوە، ئیسرائیل هێرشێکی ئەلیکترۆنی بەرفراوانی بۆ سەر ژێرخانە گرنگەکانی ئەو وڵاتە دەستپێکردووە.