عێراقچی: لەبەردەوامی هێرشەکانی ئیسرائیل گفتوگۆ لەگەڵ هیچ کەسێک ناکەین

ئاڤا نیوز

وەزیری دەرەوەی ئێران بە تەلەڤزیۆنی فەرمی وڵاتەکەی ڕاگەیاندوو، کە ئێران لەگەڵ هیچ لایەنێک گفتوگۆ ناکات لە ئەگەری بەردەوامی هێرشەکانی ئیسرائیل.

 

چیرۆکی سەرەکی: جەنگی نێوان ئیسرائیل و ئێران پێدەنێتە ڕۆژی هەشتەم و هەردوو وڵات دەیان پێگەی ستراتیژی سەربازی و بنکە ئەتۆمییەکانی یەکتریان بۆردوومان کردووە و هیچ ئاماژەیەک بۆ دامرکاندنەوەی ئاگری ئەم جەنگە نییە.

 

لێدوانی فەرمی: عەباس عێراقچی، وەزیری دەرەوەی ئێران بە تەلەڤزیۆنی فەرمی ئێرانی ڕاگەیاندووە، "ئامادەنین گفتوگۆ لەگەڵ هیچ لایەنێکدا بکەین، لە بەردەوامی هێرشەکانی ئیسرائیل بۆ سەر وڵاتەکەمان."

 

دەشڵێت، "دوای خۆڕاگری ئێران لە بەرامبەر هێرشەکانی ئیسرائیل، بەئەگەری زۆرەوە هەندێک وڵات خۆیان لەم دەستدرێژییە دوور دەخەنەوە".

 

لەلایەکی دیکەوە: ئەم هەڵوێستەی عێراقچی ئەمڕۆ دوای ئەوە هات کە کۆشکی سپی ڕایگەیاند کە دۆناڵد ترەمپ، دوو هەفتە مۆڵەتی بە تاران داوە، پێش ئەوەی بڕیارێکی یەکلاکەرەوە بدات سەبارەت بەبەشداریکردن لە جەنگەکە.