حیزبوڵڵای عێراق هەڕەشەی داخستنی گەرووی هورمز دەكات

ئاڤا نیوز

بەرپرسێكی سەربازی لە میلیشیاكانی حیزبوڵڵای عێراقی هەڕەشەی داخستنی گەرووی هورمز دەكات، ئەگەر هاتوو ئەمریكا لە بەرژەوەندی ئیسرائیل بچێتە نێو جەنگی ئێران و ئیسرائیلەوە.

وێنە گەورەكە: ژمارەیەك گرووپ و ملیشیای عێراقی كە خۆیان بە بەرەی مقاوەمەی ئیسلامی ناودەبەن، لەلایەن ئێرانەوە پاڵپشتی و پشتیوانی دەكرێن و بەردەوام هەڕەشەی چەكداری لە ئیسرائیل و ئەمریكا دەكەن.

لێدوانی فەرمی: ئەبوعەلی عەسكەری، فەرماندەی سەربازی لە كەتائیبی حیزبوڵڵا كە ڕاستەوخۆ لەلایەن ئێران پاڵپشتی دەكرێن، لە تۆڕی كۆمەڵایەتی ئێكس، نووسیویەتی: "جەخت دەكەینەوە لەوەی كە بنكە و بارەگا و بەرژەوەندییەكانی ئەمریكا لە ناوچەكە بەئامانج دەگرین، هەروەها هەردوو گەرووی هورمز و بابولمەندەب دادەخەین و بەندەرە نەوتییەكان لە دەریای سوور لەكار دەخەین، ئەگەر ئەمریكا بڕیاری بەشداریكردن لەو جەنگەدا بدات."

لەلایەكی دیكەوە: چەند ڕۆژێك لەمەوبەر دۆناڵد ترەمپ، سەرۆكی ئەمریكا ڕایگەیاند، هێشتا بڕیاری ئەوەیان نەداوە بەشداری هێرشكردنە سەر ئێران بكەن یاخود نا.

ئەوەی پێویستە بیزانیت: گەرووی هورمز بە قورگی ئابووری جیهان دادەنرێت بەو پێیەی 20%ـی تێكڕای گواستنەوەی نەوتی جیهان لەو بەندەرەوە تێپەڕ دەبێت و بە داخستنی شاڕێگەی ئابووری بازاڕی سووتەمەنی پەكی دەكەوێت.