ئاژانسی نێودەوڵەتیی وزەی ئەتۆم: هێرشکردنە سەر پێگە ئەتۆمییەکانی ئێران کارەساتی گەورەی بەدوا دێت

ئاڤا نیوز

سەرۆکی ئاژانسی نێودەوڵەتیی وزەی ئەتۆم هۆشداری تووند دەدات لە هێرشکردنە سەر پێگە ئەتۆمییەکانی  ئێران و بە هۆکاری کارەساتی گەورە ناوزەندی دەکات.

وێنە گەورەکە: هێرشی ئیسرائیل بۆ سەر بنکە ئەتۆمییەکانی ئێران بووە بە مەترسیەکی گەورە و پرسێکی نێودەوڵەتی، هۆشداری گەورە دەدرێت لە سەر مەترسی تیشکدانەوەی ئەتۆمی و دروستبوونی کارەساتی مرۆیی لە ئەنجامی هێرشکردنە سەر ئەو بنکە ئەتۆمییانە.

لێدوانی فەرمی: ڕافایل گروسی، سەرۆکی ئاژانسی نێودەوڵەتیی وزەی ئەتۆم لە میانەی وتارێکدا لە کۆبوونەوەی نائاسایی ئەمڕۆی ئەنجوومەنی ئاسایشی نێودەوڵەتی سەر بە نەتەوە یەکگرتووەکان، هۆشداری تووندی دا سەبارەت بە هێرشکردنە سەر دامەزراوە ئەتۆمییەکانی ئێران و ڕایگەیاند، ئێستا دۆخی دامەزراوەی ئەتۆمی بوشەهر لە ئێران زۆر جێگەی نیگەرانی و دوو دڵییە، مەترسی گەورەی تیشکدانەوەی ئەتۆمی لەسەرە.

هەروەها لە ئەنجامی هێرشی ئیسرائیل چوار باڵەخانە لە بنکەی ئەتۆمی ئەسفەهان ڕووخاون و کارەبای بنکەی ئەتۆمی نەتەنز لە کارخراوە، دەبێت ئیسرائیل و ئەمریکا خۆیان بەدوور بگرن لە هێرشکردنە سەر بنکە ئەتۆمییەکان، چونکە دەبێتە هۆی درووستبوونی تیشکدانەوەی ئەتۆمی و ئەمەش کارەساتی مرۆیی دروست دەکات.

- ئێران هەموو پێداویستییەکانی بوون بە خاوەنی چەکی ئەتۆمیی لە بەردەستە و دەبێت ڕێگەچارەی دیپلۆماسییانە بگیرێتەبەر بۆ ئەوەی ئێران نەبێت بە خاوەنی چەکی ئەتۆم.

لە لایەکی دیکەوە: دەسەڵاتدارانی ئێرانی ڕایانگەیاندووە، هێرشی ئیسرائیل بۆسەر بنکەی ئەتۆمی بووشەهر زیانی بە بنکەکە گەیاندووە، بەڵام تاوەکو ئێستا هیچ تیشکدانەوەیەکی ئەتۆمی تۆمار نەکراوە.