وەزیری بەرگریی تورکیا: بۆ هەموو جۆرە ئەگەرێک ئامادەین

ئاڤا نیوز

وەزیری بەرگری تورکیا سەبارەت بە جەنگی نێوان ئیسرائیل و ئێران دەڵێت، بۆ هەموو جۆرە سیناریۆیەک ئامادەین و بەردەوام دەبین لە ئامادەکارییەکانمان، ڕێوشوێنی خۆپارێزی پێویست بۆ وڵاتەکەمان دەگرینە بەر.

ئەم پەیامەی گولەر داوی پەیامەکەی ڕەجەب تەیب ئەردۆغان، سەرۆککۆماری تورکیا دێت کە بەهەمان شێوە "ئامادەیی تورکیای لە هەر جۆرە سیناریۆیەک کە لە ئەگەری تەشەنەسەندنی جەنگەکە بۆ تورکیا نیشان دا".

وێنە گەورەکە: جەنگی نێوان ئیسرائیل و ئێران هەفتەیەکی تێپەڕاند، هەردوو وڵات بەردەوامن لە بۆردوومانی یەکتر و کاریگەریی لەسەر وڵاتانی ناوچەیی دروست کردووە، تورکیا یەکێک لەو وڵاتانەیە کە بەردەوام جەخت لە ئامادەکارییەکانی دەکاتەوە.

لێدوانی فەرمی: یەشار گولەر، وەزیری بەرگری تورکیا لەسەر دۆخی ئێستای ڕۆژهەڵاتی ناوەڕاست و جەنگی نێوان ئیسرائیل و ئێران گوتی: "ئێمە ئامادەکاریمان کردووە بۆ هەموو جۆرە سیناریۆیەک، ئێمە بە ئاگاداری و  وریاییەوە چاودێری دۆخەکە دەکەین، هەموو جۆرە ڕێوشوێنێکی خۆپارێزمان گرتووەتە بەر. لەبەر ئەوەی ئێمە باش دەزانین چۆن پارێزگاری لە گەلەکەمان بکەین".

لەلایەکی دیکەوە: گولەر چەند ڕۆژێک لەمەوبەر سەردانی سنووری نێوان تورکیا و ئێرانی کرد، بۆ ئەوەی ئاگاداری دۆخی ئەمنی ناوچەکە بێت.

ئەوەی پێویستە بیزانیت: ئێستا 60 هەزار سەربازی تورکی لەسەر سنووری تورکیا و ئێران لە ئامادەباشیدان، بۆ پاراستنی سنوورەکە، وەزارەتی بەرگری تورکیا ڕایگەیاندووە، لە ئەگەری زیادبوونی مەترسییەکان، ژمارەی سەربازەکان زیاد دەکەین.