جگە لە پێنج شوێن ئینتەرنێتی هەموو کوردستان دەوەستێت

ئاڤا نیوز

 

وەزارەتی گواستنەوە و گەیاندن ڕایگەیاندووە، لە بەیانی ڕۆژی یەکشەممەوە بە هەمان میکانیزمی پێشوو بۆ ماوەیەکی کاتی ئینتەرنێت لە هەموو هەرێمی کوردستان دەوەستێت، جگە لە پێنج شوێن کە دیاری کراون.

 

وێنە گەورەکە: هەفتەی پێشوو بەهۆی شەڕی نێوان ئێران و ئیسرائیل، وەزارەتی پەروەردەی حکومەتی هەرێمی کوردستان بۆ ماوەی هەفتەیەک تاقیکردنەوەکانی پۆلی 12ـی دواخست. ساڵانە لە کاتی بەڕێوەچوونی تاقیکردنەوەکان بۆ ماوەی کاتژمێرێک یان زیاتر هێڵی ئینتەرنێت ڕادەگیرێت.

 

ڕاگەیێنراوی فەرمی: دیلان ڕەشاد، وتەبێژی وەزارەتی گواستنەوە و گەیاندن بە ئاڤا میدیای ڕاگەیاند، لەسەر داوای وەزارەتی پەروەردە بۆ ڕێگری لە گزیکردن، لە ڕۆژانی تاقیکردنەوە کاتژمێر 6:30 بەیانی تا 7:45 واتا بۆ ماوەی یەک کاتژمێر و 15 خولەک هێڵی ئینتەرنێت و هەموو جۆرە نامەیەکی (MMS) لە هەموو هەرێمی کوردستان دەبڕدرێت.

 

دیلان ڕەشاد ئەوەش دەڵێت: پێنج شوێن دیاریکراون کە هێڵی ئینتەرنێتیان نابڕێت ئەمانەن:

-    سەنتەری زانیاریی هەژماری من، لە گەڕەکی (32)ـی پارک.

-    سەرجەم ئامێرەکانی ڕاکێشانی پارە (ATM).

-    سەرجەم بانکەکان.

-    فرۆکەخانەکانی نێودەوڵەتیی هەولێر و سلێمانی.

-    داتا سەنتەری (پرۆژەی ڕووناکی) و (پێوەری زیرەک).