پزیشکیان: لەژێر هیچ فشارێکدا بەرنامە ئەتۆمییەکەمان ڕاناگرین

ئاڤا نیوز

سەرۆککۆماری ئێران دەڵێت، هەرچەندە وڵاتەکەی ئامادەیە گفتوگۆ لەسەر بەرنامە ئەتۆمییەکەی بکات، بەڵام لەژێر هیچ فشارێکدا "بەرنامە ئەتۆمییە ئاشتیخوازانەکەی" ڕاناگرێت.

وێنە گەورەکە: بەهۆی نزیکبوونەوەی ئێران لە ڕێژەی پیتاندنی یۆرانیۆمی پێویست بۆ دروستکردنی چەکی ئەتۆم، ئیسرائیل و بەشێکی دیکە لە وڵاتانی جیهان گومانیان هەیە ئێران بەرنامە ئەتۆمییەکەی تەنیا بۆ مەبەستی ئاشتی بێت و لەو چوارچێوەیەشدا ئیسرائیل جەنگێکی سەربازیی دژی ئێران دەستپێکردووە، وڵاتانی دیکەش داوا لە تاران دەکەن گەرەنتی تەواو بدات بەوەی بیر لە دروستکردنی چەکی ئەتۆم نەکاتەوە.

ڕاگەیێنراوی فەرمی: ئاژانسی فەرمی ئێران ئێرنا بڵاویکردەوە، لە میانەی پەیوەندییەکی تەلەفۆنیدا لەگەڵ ئیمانیۆل ماکرۆن، سەرۆکی فەرەنسا، مەسعود پزیشکیان، سەرۆککۆماری ئێران جەختیکردووەتەوە لەوەی تاران بۆ هەموو هاوکاریی و هەماهەنگییەک کراوەیە، بەڵام هەموو فشارێک بۆ دەستبەرداربوون لە "بەرنامە ئەتۆمییە ئاشتیخوازانەی" ڕەتدەکاتەوە.

ئەوەشی خستووەتەڕوو، ئێران ئامادەیە گفتوگۆ لەسەر بەرنامە ئەتۆمییەکەی بکات، بەڵام لە ژێر هیچ فشارێکدا قەبووڵی ناکات ئاستی چالاکییە ئەتۆمییەکانی بۆ "سفر" نزم بکاتەوە.