یاری گۆڵف و بڕیارە هەستیارەکانی ترەمپ بەرامبەر ئێران

ئاڤا نیوز

 

بەرەبەیانی ئەمڕۆ، ئەمریکا بە بڕیاری دۆناڵد ترەمپ و بە جوڵاندنی فڕۆکەی B2، بەشێوەیەکی ڕاستەخۆ بەشداری لە جەنگی نێوان ئیسرائیل و ئێران کرد، ئەوەی جێگەی تێڕامانە ئەمە دووەم بڕیاریی هەستیاری سەرۆکی ئەمریکایە لەبەرامبەر ئێران لەکاتێکدا کە لە یاری گۆڵفە. 

چیڕۆکی سەرەکی: ترەمپ بڕیاریدا بوو لە ماوەی دوو هەفتەی داهاتوودا چارەنووسی جەنگی نێوان ئیسرائیل و ئێران یەکلایی بکاتەوە، بەڵام بە خێرای لە پشووی خۆی گەڕایەوە لەکاتێکدا کە لە یاری گۆڵف بوو لە پاڵم بیچی فلۆریدا، بە هێمنی و بێ ئاگاداری ئەم هێرشەی ئەنجامدا و فڕۆکەی B2 شەش بۆمبیGBU-57 ئاراستەی فۆڕدۆ کرد.

 

ئەوەی لەبارەیەوە دەگوترێت: ئەوەی جێگای تێڕامان و وردبوونەوەیە، ترەمپ لەو کاتەی لە یاری گۆڵفە زیاتر بڕیارە هەستیارەکان دەدات، بەپێی ڕۆژنامەی پۆلەتیکۆی ئەمریکی و ڕۆژنامەی زە گاردیان، ئەو کاتەی بڕیاری کوشتنی قاسم سولەیمانی دا لە 2-1-2020، لە شوێنی تایبەتی خۆی لە گۆڕەپانی گۆڵفەکەی لە فلۆریدا بووە و لەگەڵ لیندسی گراهام، سیناتۆری ئەمریکی تاوتوێی ئەم ئۆپەراسیۆنەی کردووە و هەر لەو شوێنە بڕیاری کۆتایی لە بارەی کوشتنی قاسم سولەیمانی و ئەبو مەهدی موهەندیس داوە.

 

لەلایەکی دیکەوە: بۆب ودوارد، ڕۆژنامەنووسی ئەمریکیی لە کتێبەکەیدا کە ناوی "توڕەییە" نووسیویەتی"، ترەمپ لە گۆڕەپانی گۆڵفەکەی لە فلۆریدا، بڕیاری کوشتنی قاسم سولەیمانی، فەرماندەی هێزی قودسی سوپای پاسدارانی ئێران دا.