ئێران ئەمشەو هێرشی کردووەتە سەر هیچ شوێنێکی عێراق و کوردستان؟

ئاڤا نیوز

هاوکات لەگەڵ هێرشکردنە سەر بنکەی سەربازیی عودەیدە لە قەتەر، وا بڵاوکرایەوە ئێران هێرشی کردبێتە سەر بنکەی سەربازیی عەین ئەسەد لە ئەنبار و فڕۆکەخانەی هەریر لە هەولێر، بەڵام هەردوو هەواڵەکە ڕەت کرانەوە.

وێنە گەورەکە: جەنگی ئیسرائیل و ئێران  11 ڕۆژە هەڵگیرساوە، دوای هێرشەکەی 22ی ئەمانگەی ئەمریکا بۆ سەر وێستگە ئەتۆمییەکانی ئێران و وەڵامی ئەمڕۆی ئێران، دۆخی ڕۆژهەڵاتی ناوەڕاست ناجیگیرە و مەترسی هەیە جەنگەکە زیاتر فراوان بێت و ببێتە جەنگێکی هەرێمی، عێراقیش یەکێکە لەو وڵاتانەی زۆرترین مەترسی لەسەرە پریشکی شەڕەکەی بەربکەوێت.

ئەوەی لەبارەیەوە گوترا: لە سەرەتای هێرشەکەی ئەمشەوی ئێران، لەکاتێکدا لە قەتەر، ئیمارات، سعوودیە، بەحرەین و سووریا زەنگی ئاگادارکردنەوە لێ دەدرا، میدیاکانی ئیسرائیل بڵاویان کردەوە ئێران بە مووشەک بنکەی سەربازیی عەین ئەسەدی لە پارێزگای ئەنباری ڕۆژئاوای عێراق بۆردوومان کردووە، بەڵام هەر زوو پۆلیسی پارێزگاکە هەواڵەکەی ڕەت کردەوە، ئێران خۆیشی بەفەرمی ڕایگەیاند تەنیا هێرشی کردووەتەوە سەر بنکەی سەربازیی ئەمریکا لە قەتەر.

 

لەلایەکی دیکەوە: لە تۆڕە کۆمەڵایەتییەکان وا بڵاوکرایەوە ئێران بە مووشەک فڕۆکەخانەی هەریریشی کردبێتە ئامانج کە پێشتر بنکەی سەربازی ئەمریکا بوو، بەڵام شێروان جەلال، قائیمقامی هەریر بە ئاڤای گوت: هەواڵەکە ڕاست نییە، قەزای هەریر ئارامە و هیچ هێرشێک نەکراوەتە سەر هیچ شوێنێکی ئەو قەزایە، ئەو دەنگۆیانەی لە سۆشیاڵ میدیا بڵاوکراونەتەوە دوورن لە ڕاستییەوە.

ئەمەش بزانە: بەهۆی هەڵگیرسانی جەنگەکەوە لە 13ی ئەم مانگە، عێراق سەرجەم گەشتە ئاسمانییەکانی لە فڕۆکەخانەکانی ڕگرتبوو جگە لە بەسرە نەبێت، ئەمشەویش هاوکات لەگەڵ  حکومەتەکانی قەتەر، ئیمارات، کوەیت و بەحرەین بەهۆی مەترسی هێرشەکانی ئێران گەشتەکانی لە فڕۆکەخانەی بەسرەش ڕاگرت.