کاردانەوەی خێرای وڵاتان بەرامبەر هێرشی ئێران بۆ سەر قەتەر

ئاڤا نیوز

 

هێرشی مووشەکی ئێران بۆ سەر قەتەر کاردانەوەی خێرایی وڵاتانی بەدوای خۆیدا هێنا و بەشێکی زۆری وڵاتان بەتووندی ئیدانەیان کرد.

 

چیرۆکی سەرەکی: وەکو وەڵامدانەوەیەک بۆ هێرشی ڕۆژی ڕابردووی ئەمریکا بۆ سەر وێستگە ئەتۆمییەکانی ئێران، سوپای پاسداران بە شەش مووشەکی بالیستی هێرشی کردە سەر بنکەی سەربازی عودەیدە لە قەتەر و سیستیمی بەرگریی ئاسمانیش بەرپەرچی هیرشەکانی دایەوە، دوا بەدوای ئەوە کاردانەوەی خێرای وڵاتانی بەدوای خۆیدا هێنا. 

 

ڕاگەیێنراوی فەرمی: وەزارەتی دەرەوەی سعودییە ڕایگەیاند: پشتیوانی لە قەتەر دەکەین لە هەر هەنگاوێک و ڕێکارێک کە دەیگرێتە بەر، بە هەموو توانامانەوە پشتیوانی لەو وڵاتە دەکەین، هێرشە مووشەکییەکانی ئەمشەوی ئێران بۆ سەر قەتەر ئیدانە دەکەین و پێشێلکردنی ئاشکرای یاسا نێودەوڵەتییەکانە.

 

٠ هەر دوای هێرشەکەی ئێران، قەتەر ڕاگەیێنراوێکی لەوبارەیەوە بڵاوکردەوە: بە تووندی ئیدانەی هێرشە مووشەکییەکەی تاران دەکەین بۆ سەر وڵاتەکەمان، سیستیمی بەرگری ئاسمانی وڵاتەکەمان بەرپەرچی هێرشە مووشەکییەکانی داوەتەوە و زیانی نەبووە. 

 

٠ حکومەتی بەریتانیا لە ڕاگەیێنراوێکی خێرایدا باس لەوەدەکات: حکومەتی بەریتانیا داوای لە هاووڵاتیانمان کردووە ئاستی پارێزراوی خۆیان زیاد بکەن و لە قەتەر بڕۆنە شوێنە سەلامەتەکان. 

 

٠ ئیمارات، بە تووندترین شێوە ئیدانەی هیرشە مووشەکییەکانی ئەمشەوی ئێران بۆ سەر بنکەی سەربازی عودەید لە قەتەر کرد، لە بەیاننامەیەکدا وەزارەتی دەرەوەی ئیمارات هاوسۆزی تەواوی وڵاتەکەی بۆ قەتەر دەربڕی.

 

٠ ئوردن، بە تووندی سەرکۆنەی هێرشەکەی ئێرانی بۆ سەر وڵاتێکی سەربەخۆ دەکات و بە پێشێلکردنی ئاشکرای سەروەری وڵاتی قەتەر و یاسا نێودەوڵەتییەکان ناوی دەبات و داوای چارەسەری دیپلۆماسی بۆ قەیرانەکان دەکات.

 

٠ عومان، هێرشە مووشەکییەکەی ئێرانی بە کردەوەیەکی هەڵە بۆ سەر وڵاتێکی ئەندام لە  ئەنجوومەنی هاوکاری کەنداو ناو برد و ئاماژەی بەوەش کرد هێرشەکە هەڕەشەی فراوانکردنی بازنەی ململانێکان دەکات، کە جگە لە زیان و وێرانکاری بۆ ناوچەکە هیچی دیکەی لێناکەوێتەوە .

 
٠ لە بەیاننامەیەکدا وەزارەتی دەرەوەی عێراق، هێرشەکەی ئیران بۆ سەر قەتەر ئاماژەیە بۆ گرژیی زیاتر و هەڵکشانی ململانێکانی ناوچەکەی بە وەرچەرخانێکی مەترسیدار ناو برد. 

 

٠ پەرلەمانی عەرەبی بەتووندی ئیدانەی هێرشەکەی ئەمشەوی ئێرانی کرد بۆ سەر قەتەر و بە پێشێلکارییەکی ئاشکرا و پێشێلکردنی یاسا نێودەوڵەتییەکانی دەزانێت.