سوودانی دوای هێرشەکەی ئێران: هەمووان لە گرژکردنی زیاتری دۆخەکە دووربکەنەوە

ئاڤا نیوز

سەرۆکوەزیرانی عێراق بەتەلەفۆن لەگەڵ میری قەتەر و سەرۆکی ئیمارات قسەی کرد و ڕایگەیاند، پێویستە هەمووان لە گرژکردنی زیاتری دۆخەکە دووربکەنەوە تا ئاشتی و ئاسایشی ناوچەکە لەوە زیاتر نەکەوێتە مەترسییەوە.

وێنە گەورەکە: لە کاردانەوەی هێرشەکانی 22ی ئەم مانگەی ئەمریکا بۆسەر وێستگە ئەتۆمییەکانی ئێران، ئەمشەو ئێران هێرشێکی مووشەکی بۆسەر بنکەی هێزەکانی ئەمریکا لە قەتەر ئەنجامدا، هاوکات تەواوی بنکەکانی دیکەی ئەمریکاش لە کەنداو و وڵاتانی دیکە ناوچەکە کەوتوونەتە ئامادەباشی.

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لە هەژماری فەرمی خۆی لە تۆڕی ئێکس بڵاویکردەوە، "لەبەر ڕۆشنایی پێشهاتەکانی ناوچەکە، بەجیا پەیوەندییمان لەگەڵ هەر یەک لە میری دەوڵەتی قەتەر، شێخ تەمیم بن حەمەد ئال سانی و سەرۆکی دەوڵەتی ئیماراتی عەرەبی یەکگرتوو، شێخ محەمەد بن زاید ئال نەهیان ئەنجامدا، هاوسۆزی عێراقـمان لەگەڵ دەوڵەتی قەتەر دووپاتکردەوە".

ئەوەشی خستووەتەڕوو، "جەختمان کردەوە لەسەر سەروەری و ئاسایش و پێویستی دوورکەوتنەوە لە هەنگاوی زیاتر، بۆ ئەوەی نەبێتە هۆی پەرەسندنی هەڵوێستەکان و ناوچەکە بخاتە بەردەم مەترسییەک کە هەڕەشە لە ئاسایش و سەقامگیری و ئاشتی لە سەرانسەری جیهان بکات".