گەشتە ئاسمانییەکانی فڕۆکەخانەکانی هەولێر و سلێمانی دەستپێدەکەنەوە

ئاڤا نیوز

دوای ڕاگەیاندنی ئاگربەست لەلایەن ئەمریکاوە سەبارەت بە جەنگی نێوان ئیسرائیل و ئێران، گەشتە ئاسمانییەکانی فڕۆکەخانەکانی هەرێمی کوردستان دەستپێدەکەنەوە.

وێنە گەورەکە: ماوەی 11 ڕۆژە گەشتی ئاسمانی لە فڕۆکەخانەکانی هەولێر و سلێمانی وەستاون و هەزاران هاووڵاتی بەوهۆیەوە نەیانتوانیوە گەشت بکەن، سەدان هاووڵاتیی دیکەش لە وڵاتانی دەرەوە گیریان خواردووە و ناتوانن بگەڕێنەوە، بەڵام دوای ڕاگەیاندنی ئاگربەستی جەنگی نێوان ئیسرائیل و ئێران، ئاسمانەکانی عێراق بە هەرێمی کوردستانیشەوە بەڕووی گەشتیارانەوە کرانەوە.

لێدوانی تایبەت: ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ئاڤای ڕایگەیاند، "بە بڕیاری دەسەڵاتی فرۆكەوانیی مەدەنیی عێراق، گەشتی سەرجەم فڕۆکەخانەکان ئاسایی دەبێتەوە، ئێستا سەرقاڵی ڕێکخستنی خشتەی گەشتەکانین و هەر ئەمڕۆ گەشتە ئاسمانییەکان دەستپێدەکەینەوە."

ئەوەی پێویستە بیزانیت: بەھۆی جەنگی نێوان ئیسرائیل و ئێران لە ماوەی 10 ڕۆژی ڕابردوودا ژمارەی ئەو گەشتە ئاسمانییانەی ھەڵوەشاونەتەوە، بریتیی بوون لە ھەزار و 283 گەشت بە جۆرێک ھەزار و 184 گەشت لە فڕۆکەخانەی نێودەوڵەتیی ھەولێر و 99 گەشت لە فڕۆکەخانەی سلێمانی بووە.