پەیامێکی خێرا لە  ترەمپەوە بۆ ئیسرائیل؛ هەر ئێستا فڕۆکەکانتان بکشێننەوە

ئاڤا نیوز

دوای ڕاگەیاندنی ئاگربەستی نێوان ئیسرائیل و ئێران لەلایەن ئەمریکاوە، ترەمپ دەڵێت لە ئیسرائیل و ئێران ڕازی نیم و ئاگربەستیان شکاند. داواش لە ئیسرائیل دەکات هەر ئێستا فڕۆکەکانی بکشێنێتەوە.

چیرۆکی سەرەکی: ڕۆژی 24-6-2025، دوای 12 ڕۆژ لە جەنگ و وێرانکاری دۆناڵد ترەمپ، ئاگربەستی نێوان ئیسرائیل و ئێرانی ڕاگەیاند، بەڵام چەند کاتژمێرێک دوای ئەوە ئیسرائیل و ئێران هەڕەشەیان لە یەکتری کرد و ئیسرائیل ئێرانی بە هێرش کردن تۆمەتبار کرد.

وێنەگەورەکە: سەرۆکی ویلایەتە یەکگرتووەکانی ئەمەریکا پێش بەڕێکەوتنی بۆ بەشداریکردن لە لووتکەی ناتۆ لە لاهای، قسەی بۆ ڕۆژنامەنووسان کرد و ڕایگەیاند، زۆر نیگەرانە لەوەی ئیسرائیل و ئێران ئاگربەستیان پێشێل کردووە و دووبارە هێرشیان کردووەتە سەر یەکتر.

لێدوانی فەرمی: دۆناڵد ترەمپ، سەرۆکی ویلایەتە یەکگرتووەکانی ئەمەریکا پێش بەڕێکەوتنی بۆ بەشداریکردن لە لووتکەی ناتو لە لاهای، قسەی بۆ ڕۆژنامەنووسان کرد و ڕایگەیاند، زۆر نیگەرانە لەوەی ئیسرائیل و ئێران ئاگربەستیان پێشێل کردووە و دووبارە هێرشیان کردووەتە سەر یەکتر، دوای ئەوەی ئاگربەستی شەڕ چووەتە بواری جێبەجێکردنەوە، ئیسرائیل ژمارەیەکی زۆر بۆمبی لە ئاسمانی ئێران خستووەتە خوارەوە و ئەمەش زۆر نیگەرانی کردووە.

- "داوا لە بەرپرسانی ئیسرائیل و ئێران دەکەم، پابەندی ئاگربەستەکە بن و دۆخەکە هێور بکەنەوە، خەریکە بارودۆخی ڕۆژهەڵاتی ناوەڕاست ئارام دەبێت".

- لەبارەی بەرنامەی ئەتۆمیی ئێرانیش، ترەمپ گوتی: ئێران جارێکی دیکە ناتوانێت پەرە بە بەرنامە ئەتۆمییەکەی بدات، چونکە فڕۆکەوانەکانمان بە تەواوەتی بنکە ئەتۆمییەکانیان لەنێو بردووە. باسی لەوەش کرد، هەندێک دەزگای ڕاگەیاندن هەواڵی چەواشەکاری بڵاو دەکەنەوە و دەڵێن: بنکە ئەتۆمییەکانی ئێران بە تەواوی لەنێو نەچوون. 

لەلایەکی دیکەوە: سەرۆکی ئەمەریکا لە پۆستێکی تۆڕی کۆمەڵایەتیی 'تروس سۆشیاڵ' داوای لە ئیسرائیل کرد، چیدیکە بۆمب لە ئاسمانی ئێران نەخاتە خوارەوە و دەستبەجێ فڕۆکەوانەکانی بگەڕێنێتەوە وڵاتەکەی.

ئەوەی پێویستە بیزانیت: بەرەبەیانیی ئەمڕۆ 24-6-2025، ترەمپ لە پۆستێکدا لە تۆڕی کۆمەڵایەتیی تروس سۆشیاڵ ڕێککەوتنێکی بۆ "ئاگربەستی گشتگیر و تەواو" لەنێوان ئێران و ئیسرائیلدا ڕاگەیاند. بە گوتەی خۆی، ڕێککەوتنەکە "کۆتایی بە جەنگەکە" دێنێت,  بەڵام چەند کاتژمێرێک دوای ئەوە ئیسرائیل و ئێران هەڕەشەیان لە یەکتری کرد و ئیسرائیل ئێرانی بە هێرش کردن تۆمەتبار کرد.

- کاتژمێر 07:00ـی بەیانیی ئەمڕۆ سێشەممە، 24-06-2025، ئاگربەستی نێوان ئێران و ئیسرائیل چووە بواری جێبەجێکردنەوە.

کاریگەریی و لێکەوتەکان: زیانی هێرشەکانی ئێران بۆ سەر ئیسرائیل بە تەواوی نەزانران، بەڵام دەڵێن زیاتر 50 مووشەک کەوتووەتە خوارەوە و 28 کەس لە ئیسرائیل کوژراون و سێ هەزار و 238 کەسیش برینداربوون، هاوکات سوپای ئیسرائیل دەڵێت، سیستمی بەرگریی ئاسمانیی ئەو وڵاتە زیاتر لە 500 مووشەک و نزیکەی 1000 فڕۆکەی بێفڕۆکەوانی ئێرانی خستووەتە خوارەوە.

لە بەرامبەردا: وەزیری تەندروستی ئێران ئاماری کوژراو و بریندارانی سەرەتای جەنگ تا ڕۆژی ئاگربەستی ڕاگەیاند کە 606 ئێرانی کوژراون، پێنج هەزار و 332 کەسیش لە سەرەتای هێرشەکانەوە برینداربوونە.