دانیشتووانی پارێزگای بەسرە هەرەشەی گەورەترین خۆپیشاندان دەکەن

ئاڤا نیوز

وێرای ئەوەی مووچەیەکی زەبەلاحی بۆ خەرجکراوە، کەم ئاویی و ئاوی خواردنەوە گەورەترین کێشەی بۆ دانیشتووانی پارێزگای بەسرە دروستکردووە و هەڕەشەی خۆپیشاندان دەکەن.

وێنە گەورەکە: لەگەڵ بەرزبوونەوەی پلەکانی گەرما، پارێزگاری بەسرە ڕووبەڕووی قەیرانی ژینگەیی و کەمی ئاوی خوواردنەوە بووەتەوە بەجۆرێک مەترسی لەسەر تەندروستیی زیاتر لە سێ ملیۆن کەس لە دانیشتووانی پارێزگاکە دروستکردووە.

لێدوانی فەرمی: عەلاء حەیدەری، پەرلەمانتاری عێراق لەپشکی پارێزگای بەسرە ڕایگەیاند: بەهۆی کەمی ئاوی خواردنەوە و پیسبوونی، دانیشتووانی پاریزگای بەسرە لەدۆخێکی ئەوپەڕی خراپیدا دەژین و مەترسی تووشبوون بە هەندێک نەخۆشی کوشندە لەئارادایە، دیارترینیان شێرپەنجە و لەکارکەوتنی گورچیلەیە.

- حەیدەری هۆشدارییەکی توندی ئاراستەی حکومەتی فیدراڵی کرد سەبارەت بە کاردانەوەی هاووڵاتیان لەبارەی قەیرانی کەمی ئاو لە پارێزگاکەدا و جەختی لەوە کردەوە، ئەگەر ڕێوشوێنی خێرا و جددی بۆ چارەسەرکردنی قەیرانەکە نەگیرێتەبەر، ئەگەر هەیە خۆپیشاندانی سەرتاسەری پارێزگاکەی لێبکەوێتەوە.

ئەوەی پێویستە بیزانیت: پێشتر فەرمانگەی چاودێری و پلاندانانی پارێزگای بەسرە، پشکی بودجەی بەسرەی بۆ ساڵی 2023 ئاشکرا کرد و ڕایگەیاند، گەیشتووەتە نزیکەی 2.8 تریلیۆن دینار، جگە لە پارەی پێترۆدۆلار و پشکی گەشەپێدانی ناوچەکە، لەگەڵ ئەم پشکانەدا، پارەی دیکەیش بۆ پرۆژەی دیکە هەبووە، وەک دەزگای شیرینکردنی ئاو بە بودجەی 500 ملیۆن دینار، دامەزراندنی سەنتەری چارەی شێرپەنجە و گورچیلە بە بودجەی 20 ملیار دینار.