زیاتر لە یەک ملیۆن هاووڵاتی لە هەولێر فۆڕمی ئەلیکترۆنی خۆراکیان پڕکردووەتەوە

ئاڤا نیوز

 

نزیکەی مانگێکە فۆڕمی ئەلیکترۆنی خۆراک لە هەرێمی کوردستان کاراکراوە، تاوەکو ئێستا لە سنووری هەولێر نزیکەی یەک ملیۆن هاووڵاتی فۆڕمەکەیان پڕکردووەتەوە. 

وێنە گەورەکە:  لە ماوەی ڕابردوو وەزارەتی بازرگانی و پێشەسازیی عێراق، بڕیاری بە ئەلیکترۆنیکردنی فۆڕمی خۆراکی مانگانەی هاووڵاتییان دا، سەرەتا لە پارێزگاکانی عێراق دەستپێکرد و دواتر لە پارێزگای هەڵەبجە وەکو یەکەم پارێزگاکانی هەرێمی کوردستان دەستپێکرد، پاشان لە هەولێر و سلێمانی و دهۆک دەستپێکردووە، ئێستا لە سنووری پارێزگای هەولێر نزیکەی یەک ملیۆن 200 کەس فۆڕمەکەی پڕکردۆتەوە و نزیکەی 600 هەزار کەس ماوە فۆڕمەکە پڕبکاتەوە.

لێدوانی فەرمی: سیامەند قادر نانەکەلی، بەڕێوەبەری ڕێکخستنی پسووڵەی خۆراکی هەولێر، بە ئاڤا میدیای ڕاگەیاند، ئەپڵیکەیشنەکە بۆ ماوەی دوو کاتژمێر وەستا و خۆی نوێکردەوە، بەڵام دواتر کاراکرایەوە، هاووڵاتیان بەردەوامن لە پڕکردنەوەی فۆڕمی ئەلیکترۆنی خۆراک، ئێستا نزیکەی 15 ڕۆژ ماوە بۆ تەواوبوونی وادەکەی. 

٠ نزیکەی 600 هەزار کەس ماون فۆڕمەکە پڕبکەنەوە، ئەگەر بزانین ڕێژەیەکی زۆر لە هاووڵاتیان ماون بۆ پڕکردنەوەی فۆڕمەکە بە فەرمی داوا لە بەغدا دەکەین وادەکەمان بۆ درێژ بکاتەوە.

٠ بەشێکی زۆر لە کێشەکان چارەسەرکراوە و داواش لەوانەکراوە کە گرفتیان هەیە کارتی نیشتمانیان نوێ بکەنەوە. 

ئەوەی پێویستە بیزانیت: دوای تەواوبوونی وادەی پڕکردنەوەی فۆڕمی ئەلیکترۆنی دواتر تۆمارکردنی ناوی منداڵانی تازە لەدایکبوو دەستپێدەکات و کۆتا وادەش 5-7-2025 دیاریکراوە.