گواستنەوەی عێراق: دەستپێکردنەوەی گەشتەکان بە قۆناغ ئاسایی دەبێتەوە

ئاڤا نیوز

 

وەزارەتی گواستنەوەی عێراق دەڵێت، لە ئەمڕۆوە بە قۆناغ گەشتە ئاسمانییەکان ئاسایی دەبنەوە و سەرەتا گەشتە نێودەوڵەتییەکان لە فڕۆکەخانەی نێودەوڵەتی بەغدا و بەسڕە دەستپێدەکەنەوە،  لە ڕۆژانی داهاتووشدا لە هەموو فڕۆکەخانەکانی دیکە گەشتەکان دەستپێدەکەنەوە.

 

وێنە گەورەکە: لەگەڵ یەکەم ڕۆژی جەنگی نێوان ئیسرائیل و ئێران، گەشتە ئاسمانییەکان لە فڕۆکەخانەکانی عێراق ڕاگیران، بەڵام دواتر فڕۆکەخانەی نێودەوڵەتی بەسڕە تایبەت بە گەشتەکانی هێڵی ئاسمانی عێراق کرایەوە و لە 12 ڕۆژدا زیاتر لە 24 هەزار گەشتیاریی گواستەوە.

 

ڕاگەیێنراوی فەرمی: وەزارەتی گواستنەوەی عێراق لە ڕاگەیێنراوێکدا ئاماژەی بەوەشکردووە، لە ئەمڕۆوە گەشتە نێودەوڵەتییەکان  لە فڕۆکەخانەی نێودەوڵەتیی بەغدا و بەسڕە دەستپێدەکەنەوە، هاوکات بەیانی لە فڕۆکەخانەکانی دیکەی عێراق و هەرێمی کوردستانیشەوە گەشتە ئاسمانییەکان دەستپێدەکەنەوە، بەڵام گەشتەکانی ئەمڕۆ ئەوان ناوخۆیی دەبن.