کۆمیسیۆن: سبەی کۆتا وادەیە بۆ پێشکەشکردنی لیستی کاندیدان و چیتر درێژناکرێتەوە

ئاڤا نیوز

کۆمیسیۆنی هەڵبژاردنەکانی عێراق بڕیاریدا چیتر ماوەی پێشکەشکردنی لیستی کاندیدان بۆ هەڵبژاردنی پەرلەمانی عێراق درێژنەکاتەوە، بەوپێیەش سبەی پێنجشەممە وادەکە کۆتایی دێت.

 

وێنە گەورەکە: بڕیارە ڕۆژی 11ی مانگی 11ی ئەمساڵ هەڵبژاردنی پەرلەمانی عێراق بەڕێوەبچێت، 23ی حوزەیرانیش کۆمیسیۆن ماوەی پێشکەشکردنی لیستی کاندیدی لایەنە سیاسییەکانی بۆ سێ ڕۆژی دیکە درێژکردەوە.

 

ڕاگەیێنراوی فەرمی: کۆمیسیۆنی باڵای سەربەخۆی هەڵبژاردنەکانی عێراق بڵاویکردەوە، لە کۆبوونەوەی ئەمڕۆی ئەنجوومەنی کۆمیسیاران، داواکاریی ئەندامێکی ئەنجوومەنی کۆمیسیاران بۆ درێژکردنەوەی ماوەی پێشکەشکردنی لیستی کاندیدی لایەنە سیاسییەکان تاوتوێ کرد و داواکارییەکەی ڕەتکرایەوە.

 

ئەو مانایە دەگەیێنێت: لە ناوەڕاستی مانگی ڕابردووەوە دەرفەت درابوو بە لایەنەکان بۆ ئەوەی لیستی کاندیدەکانیان پێشكەش بکەن، بەوپێیەش کۆتایی دەوامی سبەی، کۆتا وادەیە بۆ پێشکەشکردنی لیستی کاندیدی حیزب و هاوپەیمانێتییەکان کە دەیانەوێت بەشداری لە هەڵبژاردنی پەرلەماندا بکەن.