مەسرور بارزانی و باڵیۆزی بەریتانیا جەخت لە دابینکردنی شایستە داراییەکانی کوردستان دەکەنەوە

ئاڤا نیوز

سەرۆکوەزیران مەسرور بارزانی پێشوازی لە باڵیۆزی بەریتانیا لە عێراق کرد، وێڕای جەخت کردنەوە لە پەیوەندی دوولایەنە، بیروڕا لەبارەی دابینیکردنی شایستە داراییەکانی کوردستان لەلایەن بەغدا ئاڵوگۆڕ کرا.

چیرۆکی سەرەکی: ڕۆژی چوارشەممە 2025-06-25، سەرۆکوەزیران مەسرور بارزانی، پێشوازی لە عیرفان سدیق، باڵیۆزی بەریتانیا لە عێراق کرد. لە دیدارەکەدا ئەندرۆ بیزلی کونسولی گشتیی بەریتانیا لە هەرێمی کوردستان ئامادە بوو.

ڕاگەیێنراوی فەرمی: لە ڕاگەیێنراوێکدا نووسینگەی سەرۆکوەزیران ڕایگەیاند، "وێڕای جەختکردنەوە لەسەر پێشخستنی زیاتری پەیوەندی دوولایەنە، بیروڕا لەبارەی پێویستیی و گرنگیی چارەسەرکردنی کێشەکانی هەرێمی کوردستان و حکومەتی فیدراڵ، بە تایبەتی دابینکردنی شایستە داراییەکانی هەرێمی کوردستان ئاڵوگۆڕ کرا . هەردوولا هاوڕابوون لەسەر پێکهێنانی کابینەی نوێی حکومەتی هەرێم لە زووترین کاتدا، کە پێویستە چیتر دوا نەکەوێت". 

زانیاریی زیاتر: لە بەشێکی دیکەی گفتوگۆکاندا ، دوایین ڕوداو و پێشهاتەکانی ناوچەکە تاوتوێ کران و جەخت لە گرنگیی پاراستنی ئاشتیی و ئارامیی لە ڕۆژهەڵاتی ناوەڕاست کرا.