عێراق تابلێتەکانی سەرژمێری دەکاتە دیاری بۆ ئوردن

ئاڤا نیوز

لە بڕیارێکدا ئەنجوومەنی وەزیرانی عێراق بە فەرمی بڕیاری داوە، سەرجەم تابلێتەکانی پرۆسەی سەرژمێری گشتی بە دیاری بداتە ئوردن. بڕیارەکەش لە ئەنجوومەنی وەزیران دراوە لە مانگی سێی ئەمساڵ.

لێدوانی فەرمی: هادی سەلامی، ئەندامی لیژنەی دەستپاکی لە پەرلەمانی عێراق، بە ئاڤا میدیای رایگەیاند ئاگاداری ئەو نووسراوە نین، بەڵام دەستبەجێ رێکكاری پێویست دەگرینە بەر و لە هۆکاری بەخشینی ئەو ئامێرانە بە وڵاتی ئوردن دەکۆڵینەوە.

لەلایەکی دیکەوە: سەرچاوەیەک لە بەشی تەکنەلۆجیا و زانیاریی وەزارەتی پلاندانانی عێراق بە ئاڤای راگەیاند، 10%ـی تابلێتەكان وەکو دیاری پێشکەش بە ئوردن کراون، ئوردن بەنیازە مانگی 11ـی ئەمساڵ  سەرژمێری گشتیی بکات، ئێمەش وەک عێراق حەزمان کرد یارمەتییان بدەین.

زانیاریی تایبەت: بەپێی زانیارییەکانی ئاڤا نزیکەی 120 هەزار تابلێت بۆ سەرژمیری گشتی دابین کرابوون، هەر یەکێکان بە 378 هەزار و 250  دینار کڕاون، كۆی گشتیی ئەو پارەیەی بۆ كڕینی تابلێتەكان خەرج كراوە نزیکەی 45 ملیار دینار بووە.