ترەمپ فشار بۆ کۆتاییهێنان بە شەڕی غەززە دەکات

ئاڤا نیوز

هاوشێوەی ئێران، ئەمریکا فشارەکانی بۆ کۆتاییهێنان بە شەڕی غەززە زیادکردووە و دەیەوێت بەزووترین کات بارمتەکان ئازادبکرێن.

وێنە گەورەکە: ترەمپ هیوادارە کۆتایی بەو ململانێیە بهێنرێت کە نزیکەی دوو ساڵ شەڕی لە ڕۆژهەڵاتی ناوەڕاستدا بەدوای خۆیدا هێناوە و بەهۆیەوە هەزاران کەس گیانیان لەدەستداوە.

زانیاریی بەدەستهاتوو: ڕۆژنامەی وۆڵ ستریت جۆرناڵ ئەوەی ئاشکراکردووە، وڵاتانی نێوەندگیر بەردەوامن لە گفتوگۆکانیان لەگەڵ ئیسرائیل و غەززە و هەردوولاش ئارەزووی خۆیان نیشانداوە بۆ ئەوەی ڕێککەوتن ئەنجام بدەن.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ئاگربەستی نێوان ئیسرائیل و ئێران وادەکات کەشی لەبار دروست ببێت بۆ ئەوەی دانوستان لە غەززەش بکرێت و بەمزوانە هەواڵی خۆش ببیستین.

لەلایەکی دیکەوە: وڵاتانی نێوەندگیر ئەوەشیان ئاشکراکردووە، پێش چەند کاتژمێرێک لە ڕاگەیاندنی ئاگربەستی نێوان ئیسرائیل و ئێران لەلایەن ترەمپەوە، ستیڤ ویتکۆف نوێنەری تایبەتی ئەمریکا بۆ ڕۆژهەڵاتی ناوەڕاست پەیوەندی بە وڵاتانی نێوەندگیر کردووە و پێی وتوون، سەرۆک ترەمپ دەیەوێت جەنگ کۆتایی پێبێت و دانوستانەکان دەستپێبکەنەوە و دواتر حەماس ئامادەیی نیشان داوە بگەڕێنەوە بۆ سەر مێزی گفتوگۆ.