وەزارەتی ناوخۆی عێراق هەڵوەشاندنەوەی 96 تۆڕ و دەستگیرکردنی 82 تۆمەتباری ڕاگەیاند

ئاڤا نیوز

وەزارەتی ناوخۆی عێراق هەڵوەشاندنەوەی 96 تۆڕی تاوانکاری و دەستگیرکردنی 82 تۆمەتبار لە چەندین ئۆپەراسیۆنی جیاوازدا ڕادەگەیێنێت.

 

بۆچی گرنگە: دەستگیرکردن و هەڵوەشاندنەوەی ئەو تۆڕانە کاریگەریی لەسەر پاراستنی ئاسایشی کۆمەڵایەتی و ڕزگارکردنی لاوازترین چینەکانی کۆمەڵگە هەیە لە چنگی مەترسیدارترین تۆڕەکانی تاوانی ڕێکخراو.

 

لێدوانی فەرمی: عەقید عەباس بەهادلی، وتەبێژی وەزارەتی ناوخۆ بە ئاژانسی هەواڵی عێراقی ڕایگەیاند: "بەڕێوەبەرایەتیی نەهێشتنی بازرگانیکردن بە مرۆڤ لە ئاژانسی هەواڵگری و لێکۆڵینەوەی فیدراڵی، لە ماوەی نیوەی یەکەمی ئەمساڵدا، توانیویەتی 62 تۆڕی قۆستنەوەی سێکسی و نۆ تۆڕی بازرگانیکردن بە ئەندامانی جەستەی مرۆڤ هەڵبوەشێنێتەوە".

 

لەهەمان کاتدا: "بەڕێوەبەرایەتییەکە 15 تۆڕی دیکەی کاری زۆرەملێ، چوار تۆڕی فرۆشتنی منداڵان و شەش تۆڕی دیکەی سواڵکردنی هەڵوەشاندووەتەوە. هاوکات 82 تۆمەتباریشی بە تاوانی سیحر و جادووگەری دەستگیر کردووە".