ئیتڵاعاتی ئێران: سەرکەوتنێکی گەورە و زێڕینمان تۆمار کرد

ئاڤا نیوز

وەزارەتی ئیتڵاعاتی ئێران دەربارەی شەڕی 12 ڕۆژە لەگەڵ ئیسرائیل ڕاگەیەنراوێکی بڵاوکردەوە و لێدانی زەبری گەورەی لە "تۆڕە سیخوڕییەکانی دوژمن" ڕاگەیاند.

چیرۆکی سەرەکی: کاتژمێر 07:00ـی بەیانیی سێشەممە، 24-06-2025، ئاگربەستی نێوان ئێران و ئیسرائیل چووە بواری جێبەجێکردنەوە و کۆتایی بە جەنگی 12 ڕۆژەی نێوانیان هات.

ڕگەیێنراوی فەرمی: لە بەیاننامەکەی وەزارەتی ئیتلاعاتی ئێراندا ئاماژە بۆ ئەوە کراوە، جارێکی دیکە دەسەڵاتی ستەمکاریی جیهانیی بە سەرۆکایەتیی ئەمەریکا و لەرێگەی ئیسرائیلەوە لاپەڕەیەکی ڕەشی دیکەی خستە سەر مێژووی پڕ لە شەرمەزاری خۆی.

- وەزارەتی ئیتڵاعاتی ئێران، لە درێژەی بەیاننامەکەیدا دەڵێت: "سەرباری سەختیی بارودۆخەکە، بە پشتیوانیی خوا و بەرەکەتی حەزرەتی وەلی عەسر (ئیمامی مەهدی) و ڕێنمایی حەکیمانەی ڕێبەری شۆڕشی ئیسلامیی حەزرەتی ئایەتوڵلا عوزما، خامنەیی و گەلی مەزنی ئێران و توانایی و ئیرادەی هێزە چەکدارەکانی ئێران، پێکهاتوو لە سوپا و سوپای پاسداران و هێزی مووشەکی و بەرگریی ئاسمانیی و پۆلیسی ناوخۆ، سەرکەوتنێکی گەورە و زێڕین بۆ وڵاتی مەزن و شۆڕشگێڕ، خاوەن شارستانیی دێرین، ئێرانی ئیسلامی، تۆمار بکەین".

باکگراوند: سەرەتای جەنگی ئێران و ئیسرائیل لە بەرەبەیانیی ڕۆژی هەینی، 13ی ئەم مانگە دەستی پێکرد، کاتێک ئیسرائیل بە زیاتر لە 200 فڕۆکەی جەنگی دەیان بارەگای سەربازی و بنکەی ئەتۆمی لە تاران و  چەندان شوێنی دیکەی ئێرانی بۆمباران کرد، هاوکات ژمارەیەک لە بەرپرسانی باڵای سەربازی و زانای ئەتۆمی کوشت، ئێرانیش لە وەڵامی هێرشەکانی ئیسرائیلدا، بۆ ماوەی 12 ڕۆژ، تەلئەڤیڤی پایتەخت و چەندان شوێنی دیکەی ئیسرائیلی بە مووشەکی بالیستی بۆمباران دەکرد.