كشتوكاڵی هەولێر: هەناردەكردنی سەوزە و میوەی هەرێمی كوردستان بۆ عێراق گرفتی نەماوە

ئاڤا نیوز

لەگەڵ ئەوەی لە پێشوودا جووتیارانی کورد کێشەیان لە ساغکردنەوەی بەرهەمەکانیان هەبوو، بەڕێوەبەری گشتیی كشتوكاڵی هەولێر دەڵیت، ئێستا ئەو کێشانە نەماون و لە نێوان حکومەتی هەرێمی کوردستان و حکومەتی ناوەند ڕێککەوتن کراوە.

وێنە گەورەکە: لە چوارچێوەی هەوڵەکانی کابینەی نۆیەم بۆ زیادکردنی سەرچاوەکانی داهات، حکومەتی هەرێمی کوردستان ستراتیژیەتی بە بازاڕکردنی بەرهەمی ناوخۆیی پەیڕەو دەکات و بەرهەمی جووتیاران هەناردەی شارەکانی عێراق و وڵاتانی عەرەبی و ئەوروپی دەکات.

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر بە ئاڤا میدیای ڕاگەیاند: بە هەوڵەكانی سەرۆكوەزیران مەسرور بارزانی، ئێستا بەرهەمی جووتیارانی ناوخۆ زیادی كردووە و جووتیاران تا ڕادەیەكی باش لەگەڵ زەوییەكانیان ئاشت بوونەتەوە و گرفتی ساغنەكردنەوەی بەرهەمەكانیان نەماوە، بەڵام پێشووتر ئەمە گرفتێكی گەورە بوو بۆ جووتیارانی هەرێمی كوردستان.

زانیاریی زیاتر: بەگوتەی بەڕێوەبەری گشتیی كشتوكاڵی هەولێر، لەچوارچێوەی گفتوگۆكانی نێوان هەردوو حكومەتی هەرێمی كوردستان و عێراق، لێكتێگەیشتنی باش هەیە سەبارەت بە هەناردەكردنی بەرهەمی سەوزە و میوەی جووتیارانی هەرێمی كوردستان بۆ ناوچەكانی باشوور و ناوەڕاستی عێراق، ئەو گرفتانەی كە پێشووتر هەبوون ئێستا تا ڕادەیەكی باش چارەسەر كراون.

"تەنیا لە هەولێر ڕۆژانە زیاتر لە 300 پشتگیریی دەدەین بە جووتیاران و بازرگانان بۆ ئەوەی بەرهەم هەناردەی باشوور و ناوەڕاستی عێراق بكەن، لەڕێی ئەو پشتگیرییەوە ڕێگرییەكانی بازگەكانی عێراق زۆر كەم بوونەتەوە".