دوو هاووڵاتی عێراقی لە تورکیا دەکوژرێن

ئاڤا نیوز

 

بەهۆی شەڕێکی دەستەویەخەوە، دوو هاووڵاتی عێراقی کە برای یەکترن لە ئورفە دەکوژرێن، وەزارەتی دەرەوەی عێراقیش دەڵێت، چاوەدێری ڕەوتی لێکوڵینەوە لە ڕووداوەکە دەکەین. 

 

چیرۆکی سەرەکی: لە ناوچەی پیشەسازی ئێڤرێن لە شاری ئۆرفەی  باشووری تورکیا، لەئەنجامی شەڕ و ناکۆکی لەنێوان دوو برای عێراقی بە ناوەکانی یوسف و محەممەد ڕاوی و هاووڵاتییەکی تورک دا،  هەردوو برا بەدەمانچە دەکوژرێن و بکوژەکەش لەلایەن پۆلیسەوە دەستگیر دەکرێت.

 

ڕاگەیێنراوی فەرمی: لە بەیاننامەیەکدا وەزارەتی دەرەوەی عێراق ڕایگەیاند: کونسوڵخانەی گشتیی عێراق لە غازی عەنتاب، لەگەڵ لایەنە پەیوەندیدارەکانی تورکیا، بەدواداچوون بۆ لێکۆڵینەوەکان دەکات بۆ دڵنیابوون لە بەڕێوەچوونی دۆسییەکە بەشێوەیەکی دادپەروەرانە .

 

لەلایەکی دیکەوە: میدیاکانی تورکیا بڵاویانکردەوە، ڕووداوەکە بە قسەی زارەکی نەشیاو لەنێوان ئەو دوو برایە و هاووڵاتییەکی تورک لە شوێنی کارەکەیان دەستیپێکردووە و بەخێرایی پەرەی سەندووە و بکوژەکە بە دەمانچە هەردوو براکەی کوشتووە.