نێردەی ئەمریکا بۆ سووریا دێتە هەولێر و لەگەڵ مەسرور بارزانی کۆدەبێتەوە

ئاڤا نیوز

نێردەی ئەمریکا بۆ سووریا، سەردانی هەرێمی کوردستان دەکات و لەگەڵ سەرۆکوەزیرانی هەرێمی کوردستان کۆدەبێتەوە. پێشبینیش دەکرێت هەر لە هەرێمی کوردستان لەگەڵ مەزڵووم عەبدیش کۆببێتەوە.

 

بڵاوکراوەی فەرمی: ماڵپەڕی "ئەلمۆنیتەر"ـی ئەمریکی لە زاری چەند سەرچاوەیەکی ئاگادارەوە ڕایگەیاندووە، تۆم باراک، نێردەی ئەمریکا بۆ سووریا، لە هەولێر لەگەڵ سەرۆکوەزیران مەسرور بارزانی کۆدەبێتەوە و ئەگەری زۆریشە لەگەڵ فەرماندەی هێزەکانی سووریای دیموکراتیش کۆببێتەوە.

 

ئەوەی لەوبارەیەوە دەگوترێت: بەگوێرەی سەرچاوەکان، تۆم باراک لە ڕۆژانی داهاتوودا سەردانی هەولێر دەکات، ئەمەش دەبێتە یەکەم سەردانی فەرمی بۆ هەرێمی کوردستان، کە لە ڕێگەی پەیوەندییەکی تەلەفۆنییەوە لە 9ـی حوزەیران لەگەڵ سەرۆکوەزیرانی کوردستان پلانی بۆ دانراوە.

 

ئەوەی پێویستە بیزانیت: بەگوتەی یەکێک لە سەرچاوەکان "باراک و سەرۆکوەزیران مەسرور بارزانی گفتوگۆ لەسەر کۆمەڵێک پرسی بەپەلە دەکەن کە پەیوەستن بە سووریا و عێراق"، کە لەو پەیوەندییە تەلەفۆنییەدا باسیان لێوەکرابوو، بەبێ ئەوەی بچێتە ناو وردەکارییەکانەوە.

 

ئەوەی پێشبینی دەکرێت: بەپێی سەرچاوەکان ئەگەری زۆرە تۆم باراک لە سەردانەکەیدا لەگەڵ مەزڵوم عەبدی، فەرماندەی گشتیی هێزەکانی سووریای دیموکراتیش کۆببێتەوە. بەڵام ئاماژەی بە شوێنی کۆبوونەوەکە نەکردووە، باسی لەوەش نەکردووە تۆم باراک سەردانی ڕۆژئاوای کوردستان دەکات یان نا، بۆیە چاوەڕوان دەکرێت کۆبوونەوەی تۆم باراک و مەزڵووم عەبدی لە هەرێمی کوردستان بێت.